【歐聯】4強首回合拜仁曾反超 最終被皇馬追和2:2;金玟哉被指罪人 合唔合理?

周三凌晨歐聯4強首回合,拜仁慕尼黑浪費領先好局,主場被皇家馬德里逼和2:2。南韓中堅金玟哉今仗兩度犯錯導致失球,成為拜仁未能勝出首回合嘅罪人,連領隊杜曹賽後都頂唔順,直接鬧佢防守太急進,鑄成大錯要孭鑊。

上半場拜仁佔優,有多個射門機會,但係利萊辛尼開波5分鐘內已錯失兩個餐士。23分鐘,皇馬首次射門立即轉化為入球,中場卻奧斯再次交出美妙直線,劏穿拜仁防線,雲尼斯奧斯祖利亞放甩金玟哉,單刀射入先開紀錄,皇馬半場領先1:0。

換邊後杜曹變陣,將利萊辛尼、穆斯亞拿左右翼位置互換,呢招果然見效。53分鐘,之前不斷敗家嘅利萊辛尼,喺右路用左腳推入中路大位勁射入網,為拜仁追平,個人亦打破去年10月以來入球荒。56分鐘,穆斯亞拿推入禁區博得12碼,哈利卡尼操刀射入,拜仁反超前2:1。

82分鐘,洛迪高高斯被金玟哉侵犯博得12碼,由雲尼斯奧斯射入,最終雙方打成2:2平手,5月9號凌晨次回合再決高下。

今場波冇突出嘅中前場球員,更突顯南韓國腳金玟哉係拜仁被逼和罪人。第一個失球係佢壓上而失位,令卻奧斯交出直線,傳到佢身後空位。失第2球亦係佢禁區內魯莽攔截輸12碼,直接累拜仁被追平。同時,踢足全場嘅金玟哉今仗喺解圍、封阻、搶截3項數據都食白果,表現奇差。

拜仁主帥杜曹,賽後直斥金玟哉係罪人:「金玟哉喺兩次失球中都太貪心喇!第一個失球,佢過早壓迫,畀卻奧斯機會傳直線,佢嘅預計太急躁,由於對手實力強大,呢啲錯誤就要受到懲罰。」