歐聯完成所有分組賽，最後一日焦點係兩支意大利球隊，AC米蘭4:0挫薩爾斯堡，相隔9年再嘗16強滋味；祖雲達斯雖然不敵聖日耳門，幸仍然保住第3名，轉戰歐霸盃。
AC米蘭曾經係歐洲班霸，但自衰落之後，多年未能參戰，上季終於再踢分組賽，卻以包尾收場。今季編入E組，最後一輪打和即可晉級。雖然對手薩爾斯堡積極搶攻，但始終未能製造入球，AC米蘭引蛇出洞、反擊湊效，基奧特最醒神，貢獻兩入球及兩助攻，拉迪高歷、梅西亞斯各入一球，大勝4:0，小組次名出線。
據Opta數據，基奧特（36歲零33天)係自2003/04賽季以來，歐聯賽事直接參與3+入球年齡最大嘅球員。
H組，祖雲達斯雖然1:2負聖日耳門，但海法馬卡比亦以1:6負賓菲加，祖記藉較佳對賽成績，壓倒同得3分嘅海法馬卡比，以第3名資格轉戰歐霸。費達歷高基艾沙養傷10個月，今仗終於復出，後備身分為祖記上陣。
賓菲加爆冷，最後成為H組首名，佢同聖日耳門同得14分，連對賽、得失球都一樣，係歐聯史上出現呢個情況，最終賓菲加藉較多作客入球首名出線。聖日耳門16強可能對手隊隊硬嘢，如果畀佢揀，一定想對波圖。
今次分組賽，英格蘭、德國各4支代表都能打入16強，佔一半席位，意大利亦有3隊，而西班牙只死剩皇家馬德里。
32隊之中，成績最差係格拉斯哥流浪，6戰全敗，失22球只入2球，創造歐聯分組賽歷史上最差成績。16強抽籤11月7號（星期一）舉行，首回合明年2月14號起上演。
歐聯分組賽前3名
A：拿玻里、利物浦、阿積士
B：波圖、布魯日、利華古遜
C：拜仁、國米、巴塞
D：熱刺、法蘭克福、士砵亭
E：車路士、AC米蘭、薩爾斯堡
F：皇馬、RB萊比錫、薩克達
G：曼城、多蒙特、西維爾
H：賓菲加、聖日耳門、祖雲達斯
