【歐聯】33次被攻門 皇馬頂得住!曼城射輸12碼 衛冕3冠夢碎 夏L被剋死冇貨交;哥帥:冇遺憾喇

曼城都輸埋!周三歐聯8強次回合,曼城同皇家馬德里法定時間踢成1:1,兩回合計4:4,加時亦互無紀錄,最終皇馬互射12碼勝出、成功晉級。曼城衛冕失敗,無緣歷史性衛冕3冠,不過領隊哥迪奧拿就話已盡全力,都冇咩遺憾喇。

曼城的確去到盡,全場32次攻門,但都畀皇馬頂住,難怪皇馬領隊安察洛堤賽後都話,銀河艦隊經歷艱辛而偉大嘅一夜。而呢一夜,隨住曼城、阿仙奴被淘汰,今屆4強已無英超球隊,月底準決賽係皇馬對拜仁、巴黎聖日耳門對多蒙特。

開賽12分鐘,洛迪高高斯接應傳中近門起腳被救出,但佢自己成功補中,皇馬先開紀錄。19分鐘,夏蘭特近門頭槌中楣,貝拿度施華補射出界。之後曼城一直狂攻,可惜奇雲迪布尼、基利殊嘅射門都搞唔掂今仗表現神勇嘅皇馬門神盧連。

直至76分鐘,曼城終於搵到缺口,由奇雲迪布尼近門勁射入網,扳平1:1。加時都係曼城天下,可惜未能改寫紀錄,要互射12碼分勝負。皇馬先有莫迪歷射失,但曼城貝拿度施華同高華錫宴客,最終皇馬以4:3勝出,連續4年殺入歐聯4強。

由於曹亞文尼停賽,皇馬今場用拿祖費南迪斯拍魯迪格鎮守中路,不過曼城皇牌夏蘭特今場仍然冇表現,今場5次射門,1次中目標,21次掂波,7次失去控球權,4次對皇馬顆粒無收。

曼城上季歷史性成為3冠王,今季亦被看好可挑戰衛冕3冠大業。可惜隨住歐聯畢業,美夢成空。領隊哥迪奧拿賽後就話冇遺憾:「我哋盡晒力,所以冇遺憾喇。皇馬防線太穩固,所以要擊敗皇馬,起碼要踢出最好表現,我哋已經交出最好表現,但都係贏唔到,實在無話可說。」