【歐聯】14年!互射12碼淘汰波圖 阿仙奴終入8強;拉也 借將蛻變歷史功臣

以為執到好籤,點知幾乎中招!周三凌晨歐聯16強次回合,阿仙奴於法定時間贏波圖1:0,令比賽進入加時,之後互無紀錄下要互射12碼,結果阿仙奴4射全中,加上借將門神拉也勇救兩球,贏4:2晉級,相隔14年後再次打入歐聯8強。

波圖之前歐聯7次對英超球隊,都被淘汰出局,真係格食格,所以抽籤之後,一般估計阿仙奴係可以輕鬆晉級,即使首回合作客先輸0:1,亦預計兵工廠可以順利反先,點知幾乎陰溝翻船。

阿仙奴今仗搶攻,13分鐘薩卡起腳被波圖門將迪奧高哥斯達撲出。之後迪勤懷斯頭槌亦無功而返,卒之去到完半場前,槍手隊長奧迪加特助攻予托沙破網,半場領先1:0。

連同首回合雙方打成1:1,換邊後一直拉鋸,期間奧迪加特有個入波被吹走,之後加時,雙方已經搏到盡,要互射12碼分勝負。

由賓福特外借過嚟嘅門將大衛拉也,先後救出波圖後衛雲迪利、翼鋒加連奴嘅12碼,而阿仙奴則4輪全中,包括奧隊、夏維斯、薩卡同迪勤懷斯,以4:2淘汰波圖晉級8強。

拉也首次出戰歐聯,即於互射12碼成為晉級英雄,賽後佢話今場係佢人生嘅高峰,好慶幸自己可以為阿仙奴出一分力,令球隊繼2009-2010球季後,再次躋身歐聯8強。

另一場16強次回合,巴塞隆拿主場3:1贏拿玻里,兩回合計以4:2淘汰對手。