【歐聯】1:1和萊比錫 驚險入8強;比寧咸靚助攻救皇馬 數據拍住麥總夏蘭特

皇馬驚險過關,激嬲安察洛堤!周三深夜歐聯16強次回合,首回合作客贏1:0嘅西甲班霸皇家馬德里,返到主場反而同萊比錫踢成1:1,而且大部份時間被圍攻,最終以總比數2:1驚險過關。

賽後皇馬主帥安察洛堤嬲爆爆,直言班波表現好差:「我哋嘅表現好差,緊密度不足,而且踢起嚟患得患失,好明顯係心理影響咗比賽!冇逼搶、冇直線、速度慢!」

皇馬今場收起近期狀態麻麻嘅洛迪高,比寧咸推前一格,同雲尼素斯攻堅,不過上半場效果一般,被首回合落後一球嘅萊比錫圍攻,不過萊比錫把握力唔掂,多次黃金機會唔係射唔中目標,就係被皇馬門將隆尼恩化解,0:0完半場。

65分鐘,比寧咸終於打破悶局,佢由中路開始突破,然後靚傳畀雲尼素斯射入,皇馬領先1:0。開心咗唔夠4分鐘,RB萊比錫由韋利柯賓頭槌頂入1:1,重燃出線希望,亦令比賽掀起高潮。

萊比錫其後圍攻皇馬,西班牙國腳丹尼爾奧莫喺補時階段靚笠射,可惜中楣彈出,最終皇馬飽食驚風散力保1:1,兩回合計贏2:1晉級8強。

連埋今場,比寧咸今屆歐聯已有4個入波同4次助攻,連續6場歐聯創造入球,係繼麥巴比同夏蘭特後,第3位連續6場歐聯有入球貢獻嘅U21球員。

另一場16強次回合,曼城半力出擊,憑艾簡治、艾華利斯同夏蘭特建功,輕鬆再以3:1擊敗哥本哈根,兩回合計大勝6:2,強勢迎接周日對利物浦嘅天王山之戰。