巴黎聖日耳門燒咁多錢，恨捧歐聯冠軍恨到發燒，但睇怕今屆又會喺16強出局。首回合主場出擊，喺麥巴比只踢33分鐘情況下，主場0比1不敵拜仁慕尼黑，要反先晉級？真係好難。
上季16強對皇馬，聖日耳門浪費大好領前優勢，被對手淘汰；今次首回合主場輸波，更凶多吉少，事關佢哋近年真係畀拜仁恰死，5次交手4次落敗，包括2020年決賽，當時拜仁由京士利高文入波，險勝1比0；今仗唯一入球，亦係來自呢位法國國腳、聖日耳門自家青訓產品，唔通真係尅星再現，天意已定？
之前已兩連敗，兩大巨星俱有傷，美斯趕及復任正選，麥巴比先做後備，更特別係右中場，用新星沙利艾美利打正選，佢只有16歲343日，成為歐聯淘汰賽史上最年輕正選球員。好聽係畀後生仔機會，其實某程度上亦反映出，聖日耳門夠份量嘅正選球員不足。
MNM唔齊腳，又點能夠抗衡強大嘅拜仁？聖日耳門處於捱打狀態，後防主力阿舒拉夫半場傷出，情況更惡劣，終於去到53分鐘，畀京士利高文先開紀錄。
麥巴比賽後好型咁話，以佢傷患情況，其實佢唔適宜上陣，但為咗幫助朋友，只有挺身而出。57分鐘麥總出場，即使帶住傷患，仍足以改變局面，帶領聖日耳門全面反攻。
73同82分鐘，麥巴比先後建功，但都因為越位在先，慘食詐胡，特別係第二球，從VAR顯示，隊友越位時，差距微小到只有一個鞋尖位，真係陰公。
美斯完場前一次近射，睇住必入，點知省中班捷文柏華特；補時階段，球王右路突破，僅僅喺禁區邊線外，又畀柏華特出交叉腳剷跌，呢位法國後衞兩黃一紅被逐，但保住勝果，相當值得。
3月9號將上演次回合，預計MNM組合可以齊整反擊，但落後一球下作客拜仁，無論點計數，聖日耳門都好大機會再緣盡歐聯，繼續等喇！
