對巴黎聖日耳門嚟講，冇嘢緊要得過歐聯，但距離冠軍卻越行越遠。周四凌晨佢哋作客0比2負拜仁慕尼黑，總比數輸0比3，連續兩屆16強出局。
為捧歐聯，聖日耳門上季力邀美斯過檔，同尼馬、麥巴比組成MNM鋒線，但反而更早出局。當然抽籤有唔好彩成份，16強已對班霸，上屆抽中皇馬，今次對拜仁；但退番轉頭諗，如果唔係分組賽唔爭氣、失去榜首，對手又點會咁強？PSG真正戰鬥力如何，心中有數。
首回合主場輸0比1，加上尼馬受重傷，今個賽季報銷，PSG反先機會早被睇淡，不過踢落唔係冇機會，中場域天拿上半場曾藉對手門將恩尼森馬控甩腳，得到射空門機會，但軟弱冇力，被馬菲斯迪歷特白界線上解圍。
同樣嘅黃金機會，拜仁就把握到，前線逼甩華拉堤嘅腳下球，由祖普莫亭61分鐘完成射門，1比0。聖日耳門失咗呢球後已知大勢已去，89分鐘畀基拿比整多粒完場。
拜仁今仗成功截斷兩大天王同其他隊友聯繫，麥巴比7項數據，包括入波、助攻、過人、關鍵傳送、成功長傳、地波成功對抗、成功爭頂，全部都係零。麥巴比賽後表示：「非常失望。拜仁建立咗一支可以爭歐聯冠軍球隊，而我哋冇。」評論相當中肯。
美斯降臨聖日耳門，目標係歐聯冠軍，但事實擺在眼前，即使阿根廷、法國、巴西三大當今球王聯手，PSG仍難以圓夢。美斯今夏約滿，但遲遲未有續約消息，之前有指美斯轉戰中東，今仗有機會就係球王最後一次亮相歐聯。
聖日耳門歐聯夢，會點樣延續？尼馬離隊幾已成定局，美斯留隊機會亦唔高，只剩麥巴比一人，會有乜新組合？除咗重組鋒線，PSG領隊加堤，教埋今季應該都會執包袱，管理層一直心儀已久嘅施丹，肯唔肯出山呢？
