歐聯A-D組踢完最後一輪分組賽，熱刺形勢一度凶險，最終作客2:1反勝馬賽，取得首名出線，但有王牌前鋒孫興民撞傷頭，要即時離場，令唔少粉絲擔心。
熱剌上仗對士砵亭，完場前最後一個攻勢入波，但爭議性地被判越位，除失去即時出線機會，領隊干地更因抗議而食紅牌。
嚟到最後一輪，和波依然出線，熱刺因此踢得好保守，甚至過分保守，被必需要贏嘅馬賽越攻越順，上半場尾段出現多次危險場面，到補時兩分鐘，後衞贊素梅賓巴頭槌破網，馬賽領先1:0。
下半場輪到熱刺追落後，藉馬賽退守又完全搶番主動權，基文迪朗格勒54分鐘追和1:1。81分鐘，熱刺賀積查治射中楣，87分鐘馬賽後衞哥拉辛拿斯近門頭槌，以為必入又僅斜出，熱剌逃過大刧，補時5分鐘由賀積查治單刀射成2:1完場。
熱刺D組首名晉級，法蘭克福作客2:1反勝士砵亭，亦打入16強。
孫興民上半場跳頂時撞傷頭，即時離場返入更衣室，懷疑有腦震盪，或者係左面眼框骨折，要等檢查結果。由於月中就踢世畀盃，好多粉絲擔心老孫傷勢，好彩外媒報導，孫仔應該抖6日度就可以復出，不過熱剌嚟緊周一凌晨主場對利物浦，除老孫外，李察利臣、古路施夫斯基繼續養傷，攻力全面受挫。
利物浦連負森林、列斯聯後，又靠歐聯攞番些少信心，主場由沙拿、達雲紐尼斯入波，主場2:0挫拿玻里。兩隊對賽前已肯定晉級，最後同得15分，拿玻里藉較佳對賽成績成為首名。
拿玻里今季之前各項賽事，17場不敗紀錄告終，目前歐洲5大聯賽，聖日耳門成為唯一未敗之師。
C組拜仁慕尼黑2:0挫國際米蘭，6戰全勝，保持分組賽34場不敗走勢、近13戰全勝輝煌紀錄，亦係史上第一支連續兩年分組賽全勝球隊；祖普莫亭亦繼續入波，近6仗有7士哥3助攻。巴塞隆拿上輪已肯定只得第3，要轉戰歐霸附加賽，今仗以4:2挫柏辛域陀利亞。
另一西甲代表馬德里體育會，B組作客1:2負波圖，連歐霸都冇得玩；利華古遜0:0和布魯日，以較佳對賽成績，壓倒同得5分嘅馬體會，成為小組第3。
隊史上首次分組賽墊底，主帥施蒙尼賽後話唔會離隊，下季將帶領馬體會再戰歐聯。
A-D組前三最後排名
A組：拿玻里、利物浦、阿積士
B組：波圖、布魯日、利華古遜
C組：拜仁、國米、巴塞
D組：熱剌、法蘭克福、士砵亭
