新一屆歐聯分組賽，以門神之夜展開！周二凌晨早場，先有紐卡素樸比5分鐘內6次撲救，令AC米蘭呼天搶地；尾場有更神奇場面出現，來自拉素門神普維迪爾。
今場係E組賽事，拉素主場迎戰馬德里體育會。馬體會於上半場29分鐘，由巴列奧斯先開紀錄，拉素一直壓住狂攻，但要去到補時5分鐘先絕地扳平，建功者係棄關助攻嘅普維迪爾。
當時拉素喺左路逼到一個角球，普維迪爾當然殺埋入對方禁區，拉素開出短角球，路爾斯艾拔圖斬中，身高6尺4寸嘅普維迪爾，飛將軍式勁頂入網，為拉素逼和1比1完場。
呢個士哥，除咗幫拉素搶番1分，亦令普維迪爾成為歐聯史上第2個憑生波取得士哥嘅龍門。值得一提嘅係，完場前助攻得手，其實普維迪爾唔係第1次。2020年意乙，佢當時效力史塔比亞，亦曾經製造同樣嘅經典場面。
普維迪爾已經29歲，可以話係大器晚成嘅球員。佢出身自烏甸尼斯青訓，2013年喺基爾禾展開職業生涯，但一直被外借至低組別聯賽，直到2017年喺安玻里先安定落嚟，之後過檔史比斯亞，到舊年先被拉素收歸旗下，堅持10年，到尋晚先完成人生首場歐聯賽事。
普維迪爾頂上功夫了得，除咗因為身高，更重要係佢嘅射手觸覺。「喺我6歲嗰陣，我第一次戴上龍門手套，但到15歲之前，其實我一直都係踢前鋒。我好好彩，之後加盟屋企附近嘅小球會，然後有機會守龍……入波係好正，但如果我作為守門員做出精彩撲救，我會感覺更好、更有成就感！」
拉素門神更透露，佢嘅兒時偶像就係經典門將托度。「我嘅門將偶像係托度，當時我睇到佢喺2000年歐洲國家盃4強對荷蘭嘅演出，之後我就愛上咗佢了。」
