【歐聯】迪布尼開波前狂嘔 夏蘭特隱晒形;曼城靠巡航導彈 作客和皇馬3:3

周三凌晨歐聯8強首回合,皇馬主場同曼城合演入球騷,打成3:3平手。下半場後段出現3個世界波,更係高潮迭起,抵捱眼瞓睇晒全場!

開波前睇雙方正選陣容,冇傷嘅奇雲迪布尼只列後備,究竟搞乜鬼?原來傳球大師去到皇馬更衣室,突然嘔到七彩,問過佢身體狀況,都係覺得唔適宜出場住,就做後備抖抖先。

皇馬今場有個災難開局,只有38秒,基亞利殊被侵犯,貝拿度施華主理罰球,離門成30幾40碼,佢見皇馬個人牆流流哋,龍門盧連又企出咗預佢斬波,該葡萄牙中場索性直射地波,真係搏到死角入網,失晒位嘅盧連急忙翻身撲救,都係鞭長莫及。

雖然108秒已經落後,但皇馬主場未驚過,12同14分鐘,已經藉魯賓戴亞斯擺烏龍,加上洛迪高高斯打快攻,一人搞掂兩個曼城後衛,為皇馬射成2:1,後來居上。

曼城之後努力反撲,但冇咗奇雲迪布尼策動,艾寧夏蘭特又冇料到,對皇馬防線冇乜威脅。見組織困難,唯有改用遠射,點知一嚟就3個世界波。

菲爾科頓、加度華爾喺66同71分鐘,都係禁區外勁射,力度角度都冇得頂,曼城再度領先3:2。皇馬即時換入莫迪歷反攻,有大師當堂唔同啲,中前場組織爽番晒。79分鐘,雲尼斯奥斯祖利亞左路傳向遠柱,費達歷高華維迪踏入禁區接應,球不著地勁射破網,又係靚到絕。兩隊3:3完場,下周四凌晨次回合,曼城主場再砌過。