剛過去嘅卡塔爾世界盃，冠軍球隊阿根廷有唔少球員都踢出超水準。但如果要數令球迷失望嘅球員，前鋒拿達路馬天尼斯肯定有份。
不過咁，返去球會賽事的話，拿達路就踢得特別精神。除咗2018/19年首個球季之外，其餘球季都能交出雙位入球數字，所以吸引到唔少大球會關注。
基於國際米蘭財困，7月暑期轉會窗極有可能要進行「瘦身」工程。唔單止要減低支出，仲要出售球員套現去還債，拿達路馬天尼斯就係其中之一。
車路士想搵世界級中鋒唔係咩秘密，奧巴美揚離隊在即，波也傷多過踢，而且亦難擔重任，盛傳車仔希望拿達路下季可以成為藍戰士一員，故此打算向國際米蘭提出收購，轉會貴為5700萬歐元。
現階段嘅國際米蘭可謂「要錢唔要貨」，對於呢個價錢當然無問題啦。之不過想收購拿達路馬天尼斯嘅球隊，唔淨止英超車路士，仲有巴塞隆拿、曼聯以及熱刺。既然多人爭，國際米蘭即時吊高嚟買，叫價去到6200萬歐元。
不過，國米同車仔關係一向友好，而且近態回勇嘅盧卡古，亦可成為籌碼之一，呢單交易似乎成事機會都唔細。
除咗拿達路，查實國際米蘭陣中仲有唔少好球員，比如門將安拿拿、中場巴利拉、左後衛迪馬高等等。相信今個暑期嘅轉會新聞，都會經常圍繞住國米，拆骨只係時間問題。
