麥巴比究竟仲有幾潛能，我哋真係估唔到。唯一可肯定呢個法國前鋒正一步一步地向球王地位邁進。
2022/23年歐聯32強分組賽，H組兩大名牌對決，巴黎聖日耳門先於主場鬥祖雲達斯。一如預期，聖日耳門今場祭出最具侵略性「MNM」進攻鐵三角，亦即麥巴比、尼馬及美斯。開賽後只係5分鐘，聖耳門即顯示前線威力，尼馬於禁區附近挑高波妙笠過晒整條祖雲達斯防線，麥巴比衝前入禁區勁射入網成1比0。
去到17分鐘，祖雲達斯反擊幾乎得手，右路古亞達度大腳傳中，新加盟「斑馬兵團」嘅前鋒米歷近距離頭錘攻門，幸得聖日耳門門將當拿隆馬擋出。化解險球之後，又輪到聖日耳門進攻。22分鐘，麥巴比與右路夏基美來過三角短傳，就咁又打穿祖雲達斯防線，麥巴比輕輕鬆鬆射成2比0。
呢個入球亦令麥巴比以23歲260日，成為史上最年青球員取得35個歐聯入球，比起隊友美斯嘅紀錄早47日。至於C朗拿度，要到27歲59日先至攞到35個歐聯入球。
祖雲達斯上半場受壓為主，整體威脅唔算太大。但下半場領隊阿里基作出變化，由原先3-5-2陣式改為4-4-2，再以「體能獸」麥堅尼入替中場馬列迪，而變動好快就收到成效。53分鐘，左路高斯迪接迎短角球後再傳中，聖日耳門門將當拿隆馬出迎失誤，麥堅尼趁機頂成1比2。
祖雲達斯追近後，成班球員都積極起來，55分鐘輪到右路古亞達度傳中，前鋒拉賀域批頂極具威脅，好彩當拿隆馬反應較快單手擋出。及後聖日耳門都搶返唔少攻勢，「MNM」組合都有射門鏡頭，無奈未能改寫比數，最終聖日耳門於歐聯首場比賽，以2比1取得勝利。
補充多個數據，祖雲達斯中場柏利迪斯今次倒戈相向，而佢表現相當之好，特別係傳送方面。根據Opta統計，今場柏利迪斯一共傳球86次，82次成功，傳球成功率達到了95.3%。相信喺普巴養傷期間，以及迪馬利亞暫時缺陣情況下，柏利迪斯將會擔起組織攻勢重責。
