歐聯首輪次日賽事，A組發生慘案，利物浦延續頹勢，防線大崩潰，喺上半場已失3球嘅情況下，最終作客1:4不敵拿玻里。高普被炒賠率，賽後急速升溫，不過佢自己就強調：我唔擔心喎！
首日賽事，車路士輸波後，領隊杜曹即被解僱。其實計季初成績同平均表現，利物浦可以話更差，英超排名亦低車路士一位。但同人唔同命，高普深受愛戴，必然長命過杜曹，但如果成績繼續低迷，作為主帥，仲有冇永遠不死金身？
利物浦英超開局，成績未如預期，關鍵主因係中後場防守力疲弱，去到歐聯，面對拿玻里快速攻擊，更加潰不成軍，幾乎一劏就開；特別祖高美斯、阿歷山大阿諾特，根本係防線毒瘤，甚至連VVD都大幅跌Watt，問你死未！
拿玻里開波5分鐘已博得12碼，施連施基主射破網，森保安古沙、基奧雲尼施蒙尼之後分別建功；如果唔係奧森漢12碼宴客、空門射中柱、VVD救空門，拿玻里上半場點止領先3:0。
下半場麥迪比入替祖高美斯，但47分鐘中路防守又被劏開，施連斯基射成4:0。除後防唔掂，沙拿、法明奴又隱形，唯有路爾斯戴亞斯保持水準，49分鐘佢喺禁區外妙射，為紅軍破蛋，輸1:4完場。A組另一仗，阿積士主場4:0大勝格拉斯哥流浪。
賽後高普被問到繼杜曹後，擔唔擔心被炒，高普就話：「我哋班主好冷靜㗎喎，佢會畀時間我去解決問題，而唔係諗用其他人去取代我。」
B組，馬體會主場2:1贏波圖，3個都係補時入波，馬體會92分鐘開紀錄，波圖96分鐘扳平，去到補時11分鐘，基沙文頂入真正絕殺。同組布魯日主場1:0贏利華古遜。
C組重頭戲，國際米蘭雖然主場，但完全唔夠拜仁揪，0:2真係輸得少。拜仁全場有近20次攻門，如果唔係門將奧拿拿有水準，國米輸得更大鑊。同組巴塞隆拿主場5:1大炒柏辛域陀尼亞，入球機器再啟動，羅拔利雲杜夫斯基連中三元。
D組熱剌食出頭胡，李察利臣梅開二度，主場2:0贏馬賽。上屆歐霸盃冠軍法蘭克福雖然主場，但以0:3大敗畀士砵亭。
