歐聯第5輪，一晚死兩支西班牙球隊！馬德里體育會最後一刻超戲劇性射失12碼，提前一輪出局；美斯離隊後，巴塞隆拿連續兩季分組賽玩完，要轉戰歐霸盃。
馬體會主場對利華古遜，兩度落後追和2:2，補時最後一個角球被解圍，球證本已吹雞完場，但VAR話有利華球員手球，判罰12碼。
當時已經99分鐘，12碼由卡拉斯高主射，先畀利華龍門哈迪基撲出，隊友衝上補頂又中楣，卡拉斯高最後補射睇住必入，又畀哈迪基白界線上神奇擋出，真正天亡我也。領隊施蒙尼同好多馬體會球員，賽後都呆企球場，唔相信球隊喺咁嘅情況下被淘汰。
B組布魯日上輪已篤定出線，今仗0:4輸畀波圖，兩隊仍攜手晉級16強。馬體會5分，利華古遜4分，打埋最後一輪先知邊隊轉戰歐霸盃。
E組，國際米蘭主場4:0大勝柏辛域陀利亞，10分次名出線16強。首名拜仁慕尼黑，作客3:0大勝巴塞，5戰全勝。巴塞4分，柏辛域陀利亞0分。
巴塞上次連續兩屆分組賽出局，係1997-98、98-99年球季，當時由尹戈爾執教，之後進入細哨、美斯盛世。隨住美斯之別，輝煌盡失，巴塞陷入連續兩屆轉戰歐霸嘅尷尬局面。
今季獲羅拔利雲度夫斯基加盟，原被寄予厚望，可惜該波蘭射手魔力未能閃耀歐聯，兩對前球會拜仁都冇士哥，反而代替佢嘅沙迪奧文尼漸入佳境。開波僅10分鐘，即以高速疾走，單刀開紀錄。
比文尼腳風更順嘅，係另一前鋒祖普莫亭，該喀麥隆前鋒於31分鐘射成2:0。完場前班捷文柏華特錦上添花，令巴塞再一次大敗喺尅星拜仁腳下，今場3個入球，都係由基拿比助攻。兩隊近6次碰頭，拜仁唔止贏晒，仲要入22球只失4球。
除馬體會及巴塞，西維爾亦早早出局，今次16強，西班牙代表只剩皇家馬德里。西甲球隊成績差到咁，歐聯史上首次出現。
國米之前對巴塞1勝1和，鋪平出線大道，今仗只要贏同組最弱嘅柏辛域陀利亞，即可打入16強。咁筍機會，當然唔會錯過。
除咗迪斯高、拿達路馬天尼斯一對前鋒，左路攻勢特強，上半場巴斯東尼、迪馬高先後傳中，由米希達利恩、迪斯高建功。下半場迪斯高入多球，到83分鐘，盧卡古休戰兩個月傷癒復出，後備登場只有4分鐘，即為國米射成4:0完場。
