【歐聯】聖日耳門大逆轉 晉級4強創紀錄;沙維怒罵球證:直紅摧毀巴塞整季!

一夜兩個瘋狂逆轉,巴黎聖日耳門同多蒙特,打入歐聯4強。其中聖日耳門藉早段打多個,作客4:1大勝巴塞隆拿,總比數贏6:4晉級,更令佢哋成為歐聯史上,第一支首回合主場落敗,次回合作客成功逆轉嘅球隊。

巴塞8強首回合作客都贏3:2,次回合開波12分鐘,又係靠拉芬夏近門撞入,先開紀錄,總比數領先至4:2,以為坐定粒六,但朗奴阿拿奧祖29分鐘被逐,令一切徹底改變。

當時聖日耳門翼鋒巴高拿殺入禁區,巴塞守將阿拿奧祖從後將佢踢跌,其實當時巴塞有另一守將從中路夾擊,但球證認為阿拿奧祖侵犯呈單刀之勢嘅巴高拿,直接紅牌。呢球係咪「直紅」有商榷餘地,但結果造就咗聖日耳門大反擊,40同54分鐘,由奧士文尼迪比利、域天拿建功,反超前2:1,總比數追平4:4。

巴塞領隊沙維慘過死,賽後狂插球證矯枉過正,一個錯誤判決,令巴塞整季努力白費。喺總比數被追和後,沙維就因大力踢廣告牌洩憤及辱罵球證,被驅逐出場。

首回合麥巴比隱形,今場趁打多個,終於發揮作用,61分鐘主射12碼得手,89分鐘再入一球,令聖日耳門最終贏4:1,兩回合計以6:4晉級4強。

兩軍唔係首次出現驚天逆轉,最經典2016至17球季歐聯16強,聖日耳門首回合主場贏4:0,雖然次回合作客魯營球場於87分鐘落後1:3,但仍有兩球優勢喺手,以為晉硬級,點知補時連失3球輸1:6,總比數輸5:6出局。今次輪到聖日耳門絕地反擊,巴塞可以話出得嚟行,預咗要還。

聖日耳門今季冇咗美斯,反而入到4強,佢哋4月30號凌晨首回合,會先作客多蒙特,繼續力爭球會歷史上首個歐聯錦標。