意大利只有3支球隊贏過歐聯，相信唔使講都估到係AC米蘭、國際米蘭及祖雲達斯。若計聯賽冠軍次數，祖雲達斯拋甩幾條街，但歐聯就以米蘭雙雄最威水。事實上，AC米蘭係史上奪歐聯冠軍第2多球隊，歷史上共有7次，另外仲有4次亞軍。
紅黑兵團最近1次贏歐聯為06/07年球季，當年於決賽以2比1擊敗老對手利物浦，其中恩沙基梅開二度。
提到對手利物浦，相信大家都會記得04/05年伊斯坦堡經典對決，AC米蘭點戲劇性輸畀紅軍，呢場波雙方球迷都講足一世。至於02/03年球季，歐聯決賽上演意甲內訌，AC米蘭憑互射十二碼砌低祖雲達斯，同樣為人津津樂道。
AC米蘭近2次捧歐聯，領隊都係安察洛堤。以前肥安曾經講過，每位AC米蘭球員都有歐聯DNA，踢歐聯比賽特別醒神。而每季歐聯4強舉行之前，唔少A米球迷都希望今年歐聯決賽係愛隊對皇家馬德里。事關皇馬現任領隊，正正就係近代帶領A米走上歐洲之巔嘅安察洛堤。
國際米蘭就贏過3次歐聯冠軍，頭2次為1964及1965年。當時由殿堂級領隊夏連尼奧希利拉執教之下，藍黑兵團成功稱霸歐陸，史稱「大國米時代」。
再去到09/10年球季，國際米蘭於「寸王」摩連奴帶領下，迎來球隊第3次歐聯冠軍，當年國米更成為三冠王，包辦意甲及意盃冠軍。難怪今時今日摩連奴帶領羅馬作客國米時，都會聽到主場球迷嘅熱烈掌聲。
米蘭雙雄於歐聯碰頭，今季原來已經係第3次。首次為02/03年球季，雙方於4強對決，首回合打和0比0，次回合再打和1比1，A米以作客入球優惠晉級。
講到呢次作客入球優惠，當年出局嘅國米就唔多服氣，事關兩回合都於聖西路球場進行，但賽例如是，唯有接受現實。正如前文所講，當年A米於決賽砌低埋另一支意甲球隊祖雲達斯，繼而奪得冠軍。
第2次就係04/05年球季，A米與國米於8強對賽，紅黑兵團兩回合分別贏2比0及3比0。齋睇比數以為係技術性擊倒，查實次回合踢到72分鐘就宣布腰斬，因當時有國際米蘭球迷向球場掟煙花，AC米蘭門將迪達更慘中「頭獎」，當時球證基於安全理由取消比賽。
經歐洲足協研訊之後，就話次回合唔會重賽之餘，再判AC米蘭贏3比0。國際米蘭無奈出局，只能怪球迷唔聽話。亦正如之前所講，AC米蘭入到決賽對利物浦，兩隊激戰120分鐘後，利物浦以互射十二碼勝出。
睇完之後大家都會發現，AC米蘭於歐聯遇到同市球隊國際米蘭的話，紅黑兵團都能夠淘汰對手兼入到決賽，唔知今季會唔會歷史重演呢？
-米蘭打吡冷知識：
- 首次米蘭打吡於1909年，連同所有賽事，米蘭打吡已進行超過300次。
- 米蘭打吡當中，入球最多係舒夫真高，佢代表AC米蘭入過14球。
- 伊巴謙莫域於米蘭打吡曾取得10個入球，代表AC米蘭入8球，代表國際米蘭入2球。
- 聖西路球場於1980年改名為基斯比梅亞薩球場，以紀念射手梅亞薩，佢兩支米蘭球隊都效力過，米蘭打吡射入過13球。
- 米蘭打吡上陣次數最多係AC米蘭嘅馬甸尼，共56次。第2位係國際米蘭辛尼迪，共47次。現時兩位同屬球隊高層。
- 執教過米蘭雙雄嘅領隊唔多，較熟悉有查柏東尼以及沙哲朗尼。另外前巴西中場李安納度，亦都執教過兩支米蘭球隊。而現任AC米蘭領隊皮奧利，16/17年球季帶過國際米蘭。
