真係估佢唔到，講嘅係比利時球隊布魯日，周四凌晨歐聯B組，作客0:0和馬德里體育會，除率先出線，更成為目前分組賽唯一不失球隊，真係威到盡。
布魯日作為比利時班霸，係歐聯分組賽常客，但限於實力，冇乜機會打入16強。今次同馬體會、波圖、利華古遜同組，雖然布魯日牌面上輸晒，但之前仍能3戰全勝，已令人非常意外。
嚟到第4輪作客馬體會，布魯日依然頂得住，前紅軍門神米奴列左飛右撲力保不失，4戰10分肯定出線。更厲害係拜仁慕尼黑今輪有失波嘅情況下，布魯日成為分組賽唯一保持清白身嘅球隊，睇吓呢支黑馬入咗淘汰賽，可以走得幾遠。
B組其他三隊都有得爭，波圖6分排第2，馬體會4分，利華古遜3分。
死亡C組，拜仁慕尼黑作客4:2贏柏辛域陀利亞，4戰4勝入16強。
巴塞隆拿老將碧基、布斯基斯連番出錯，兩度落後，全靠羅拔利雲杜夫斯基補時兩分鐘頭槌建功，加上對家補時5分鐘錯失黃金機會，僥倖主場3:3逼和國際米蘭，避過即時淘汰命運。
但只剩兩輪，國米7分，巴塞4分，國米只要下仗主場擊敗0分墊底嘅柏辛域陀利亞，即肯定晉級，巴塞將要連續兩季踢歐霸盃。
沙維執教巴塞後，踢過6場歐聯，成績只係1勝2和3負，被質疑係咪唔夠料教歐聯。親皇家馬德里嘅《阿斯報》，賽後亦即時寸爆死敵：「皇馬歐聯冠軍，巴塞歐霸球隊！」寸嘴之餘，亦為周日國家打吡做勢。
D組熱剌主場3:1挫法蘭克福，7分升榜首，馬賽、士砵亭同得6分，法蘭克福4分，仍然緊湊。
除哈利卡尼射入12碼外，孫興民梅開二度，取得個人歐聯第19個入球，超越「細哨」朗拿甸奴。
