【歐聯】第2場教歐聯 樸達進步神速 車路士3:0大勝AC米蘭 奧巴美揚入波 等咗1765日

樸達教咗車路士3場,唔止保持不敗,球隊表現亦不斷進步中,周四凌晨歐聯E組,於非勝不可形勢下,主場3:0大勝AC米蘭,表現極具說服力。奧巴美揚、科芬拿亦得到轉會後首個入球。

車路士E組前兩場只得1分,出線形勢被動,樸達接替杜曹後,上任首場即出戰歐聯,主場只能以1:1賽和薩爾斯堡,上場英超2:1險勝水晶宮,表現稍有起色,跟住迎來非勝不可歐聯硬仗,終於睇到明顯進步。

即使對手係AC米蘭,車路士仍然全面控制戰局,㩒住對手砌。三中堅高列巴尼、堤亞高施華、科芬拿,除防守穩健之外,罰球時亦發揮大杉衝擊作用。

24分鐘,車路士連環逼得角球,3支大杉輪流衝擊,令A米門前險象橫生,最後科芬拿混戰中近門射入,取得由李斯特城轉投後首個入球,車路士領先1:0。

奧巴美揚漸入佳境,同美臣蒙特、史達寧取得默契,三人合作,製造唔少埋門機會。56分鐘,列斯占士右路傳中,奧巴美揚近門撞射得手,2:0。奧巴美揚上一次喺歐聯入波,要追溯至2017年12月,已經相隔1765日,當時佢效力多蒙特,對皇家馬德里梅開二度。

史達寧雖然冇波入,但助攻有威脅,62分鐘造就列斯占士射成3:0,列斯占士喺右路攻守兼備,當選今仗最佳球員,車路士能清脆擊敗A米,取得重要3分,佢功勞相當大。

E組形勢非常緊湊,薩爾斯堡5分領先,車路士、AC米蘭都係4分,薩格勒布戴拿模3分。A米下周三凌晨,將會主場再戰車仔。