【歐聯】真係咁邪?拜仁0:1拉素 卡尼冠軍夢越行越遠;傳杜曹將被炒 摩佬接手?

哈利卡尼真係咁邪門?要唔要搵個人返嚟沖喜吓?摩佬點睇?周三歐聯16強首回合,拜仁慕尼黑全場17次射門0中目標,最終爆冷輸畀拉素0:1,繼上場聯賽吞利華3蛋後,另一條戰線亦大受打擊。

賽後拜仁主帥杜曹,就狂鬧球員,話呢場波係鬧劇:「我哋應該為呢場敗仗感到遺憾同嬲,我認為成隊拜仁都要嬲自己!上半場,我哋應該一早就領先,有3次明顯機會!下半場又變得唔穩定,有啲鬧劇嘅感覺。」

杜曹帥位極度不穩

事實上,早有德國傳媒指,拜仁高層已經對杜曹忍無可忍,多條戰線失利,依家只剩聯賽同歐聯,偏偏聯賽啱啱大敗畀利華,衛冕凍過水,而歐聯又慘吃悶棍,今季隨時四大皆空,為咗避免呢個情況出現,拜仁高層已物色新帥,暫時冇嘢撈嘅摩連奴,就係頭號目標人物。

黑仔王射手卡尼,係咪真係咁邪,難破無冠宿命?佢話:「上半場我哋有唔少機會,其中一個係屬於我,下半場更令人失望,力量與信心不足,最終我哋受到懲罰……」

拜仁今場鋒線由哈利卡尼掛帥,配合湯馬士梅拿、穆斯亞拿、辛尼攻堅,可惜上半場射極唔入,半場冇交收。換邊後戰至69分鐘,炸彈人烏柏美卡奴喺禁區攔跌伊薩臣,被判罰12碼及紅牌,拉素由恩莫比利操刀,一箭定江山,次回合喺下月5號上演。

今場17射0中框,係拜仁有記錄以來最差嘅歐聯數據。計埋上場潰敗,今仗係拜仁自2019年12月以來,首次錄得連敗。教練杜曹領軍43場輸10場,係上任主帥拿高士文領軍84場的輸波總數。

另邊廂,巴黎聖日耳門憑麥巴比同巴高拿建功,主場以2:0擊敗西甲皇家蘇斯達,先下一城。