尅星即係尅星。利物浦周三凌晨歐聯16強首回合，主場領先兩球下，竟然連失5球，以2比5慘負皇家馬德里，出線機會微乎其微。兩隊世界級門神，同一戰竟然都出現超低級失誤，導致失波，製造真正「奇跡之夜」。
連今仗在內，利物浦近7次對陣皇馬，戰績為1和6負，包括兩次決賽。今戰皇馬雖然先失兩球，但憑超強抗壓力，加上賓施馬、莫迪歷兩大元老領導，以細膩、快速、高默契地波配合，撕裂利物浦防線，完成偉大逆襲。
今次係利物浦歐聯歷史上，首次主場失5球，對上一次單場失5球，已經係56年前，1967年作客荷蘭，1比5負阿積士，當時其中一位入球球員係告魯夫。
戰情無疑峰迥路轉，激盪人心，配得上歐聯經典。利物浦夢幻開局，4分鐘沙拿右路傳中，達雲紐尼斯門前「神龍擺尾」，後腳妙射破網，連續兩仗入波，一洗敗家仔污名。14分鐘，皇馬門將古爾圖斯接應回傳，控波竟然甩晒腳，送大禮畀沙拿門前輕易射入，利物浦領先至2:0。
雲尼斯奧斯祖尼亞上屆決賽射死紅軍，21分鐘又射出美妙弧型波，收死艾利臣比加，為皇馬展開逆襲序幕。36分鐘，輪到艾利臣比加回禮，接應祖高美斯回傳，大腳解圍省中雲尼斯奧斯祖利亞，個波彈高掛網而入，而呢位巴西前鋒近5次對利物浦，取得4個入球。
利物浦前鋒有改善，但防線始終唔掂，被連追兩球後徹底崩潰，由47至67分鐘之內，竟然連失3球。中堅米列達奧無人看管下頂入，令皇馬反先，之後兩個美妙地面傳送配合，都由賓施馬完成最後一腳，皇馬最終贏5比2 ，歐聯之王當之無愧。
利物浦成為首支歐聯史上，首支於領先兩球優勢下，最終淨輸3球嘅球隊。高普賽後話球員領先後踢得太被動，欠缺緊貼追人意識。中後場問題今季一直存在，除非大換血，否則高普已經冇解決辦法。
最後要讚莫迪歷，37歲中場再顯大師級魅力，推動皇馬反擊戰，除助攻米列達奧入波，最後一球更加精彩，中後場搶走麥迪比腳下球，狂奔30碼傳畀雲尼斯奧斯，再交賓斯馬扣過對手射入，過程如行雲流水。呢位大師更征服晏菲路，87分鐘被調離場時，得到利物浦球迷起立鼓掌致敬。
