相隔20年，紐卡素再戰歐聯，作客聖西路被圍攻，最終0:0賽和AC米蘭，真正大話夾好彩，但總算有個唔錯嘅開始。
周三凌晨歐聯展開首輪分組賽，F組AC米蘭主場迎戰紐卡素極受矚目，除咗因為係死亡之組，大家亦有興趣睇吓紐卡素20年後重返歐聯戰場，究竟會踢成點。但如果唔係門將樸比以世界級表現屢救險球，加上A米屢次失機，喜鵲已經大敗一場。
上半場，紅黑軍團優勢明顯，紐卡素門將樸比更要喺5分鐘內作出6次撲救。經典場面出現喺13分鐘，卓古斯同基奧特先後攻門，被樸比救出，隨後古歷、菲奧靴蘭迪斯連環攻門，樸比再次化險為夷。
換邊後形勢變化不大，紐卡素喺下半場中段換入阿米朗同卡林威爾遜，惟組織欠奉，到肉攻門仍然寥寥無幾，戰至80分鐘，仲未有射門命中目標。最終AC米蘭全場射門25次，始終食白果而回，兩軍各得1分。
同組賽事，巴黎聖日耳門憑麥巴比先入12碼，加上阿舒拉夫埋齋，主場2:0贏多蒙特，暫時喺死亡F組彈出。
至於另一英超球隊曼城，佢哋嘅衞冕第一擊，喺主場3:1反勝貝爾格萊德紅星。上半場曼城勁黑仔，狂攻不入之下被紅星偷襲得手，先落後0比1，下半場曼城發威，最終祖利安艾華利斯梅開二度，洛迪卡斯簡迪亦有進賬，成功逆轉3:1。
全取3分當然值得慶幸，但中場貝拿度施華因傷被換出，要抖幾個星期，加入奇雲迪布尼、基亞利殊傷兵行列，中場實力全面削弱。未來三星期曼城會喺聯賽盃對紐卡素、歐聯對萊比錫及英超激戰阿仙奴，領隊哥迪奥拿賽後話：「今次麻煩喇！」
同時，哥帥受訪亦對前鋒把握力有所不滿，似暗串夏蘭特近期不濟嘅表現：「過去兩場比賽，我已經數唔到錯失咗幾多個黃金機會，我哋今場有22次射門，代表住我哋踢得好好，但入波就必須係前鋒嘅責任！」
