周三凌晨，歐聯上演第4輪分組賽，冷門連環爆。曼城畀艾寧夏蘭特抖抖，即時冇波入，以寡敵眾下，作客0:0悶和哥本哈根；皇家馬德里去到補時先入波，以1:1迫和薩克達；祖雲達斯最曳，作客以色列竟被海法馬卡比完爆，輸0:2，出線渺茫。
曼城本周日英超要對利物浦，加上G組3戰全勝，可以留力，領隊哥迪奧拿決定收起艾寧夏蘭特，畀呢位皇牌射手休息。
曼城冇咗殺神，攻力大打折扣，期間洛迪卡斯簡迪入咗球世界波，可惜隊友手球在先，加上30分鐘即有沙治奧高美斯被逐，踢法轉為保守，馬列斯亦唔爭氣，曾經射失12碼，最終同哥本哈根打和0:0。
雖然失分，但有10分嘅曼城，仍率先出線16強。事關同組嘅多蒙特1:1迫和西維爾，7分排第2，晉級機會亦非常高企；西維爾、哥本哈根都只有兩分。
F組皇家馬德里，作客薩克達前亦係3戰全勝，可能分心周日西甲打吡對巴塞隆拿，今場皇馬踢落勁度不足，46分鐘更先失1球。皇馬之後強烈反撲，全場共製造14次射門，直至補時5分鐘魯格迪破網，追和1:1。
皇馬保住唔輸，非常關鍵，4戰10分排F組榜首，餘下兩仗攞多1分搞掂。RB萊比錫作客2:0挫些路迪，6分排第2，薩克達功敗垂成，5分排第3，墊底嘅些路迪則只得1分。
H組祖雲達斯陷入更黑暗時刻，作客0:2負海法馬卡比，爆出全日最大冷門，迪馬利亞踢24分鐘即傷出，超級黑仔。近9場賽事，祖記只有2勝，球會史上第一次喺歐聯分組賽輸3場，但領隊阿里基帥位依然穩陣，因為球會缺水，所以暫時唔會賠錢換人。
祖記同海法馬卡比都係3分，聖日耳門喺美斯缺陣下，主場1:1和賓菲加，兩隊以8分領放。只剩兩輪，落後5分，祖記想追落後反先出線，機會不大。
E組賽事，車路士作客2:0挫AC米蘭，喺紅黑兵團身上連攞6分，樸達延續上任後強勢，4戰得7分，升上榜首。
A米中堅湯姆利，21分鐘犯規，輸12碼兼被逐，造就車仔輕鬆贏波。佐真奴操刀極刑，先開紀錄，奧巴美揚連續3場入波，34分鐘射成2:0，保持優勢至完場。
薩爾斯堡作客1:1和薩格勒布戴拿模，6分排第2，AC米蘭同薩格勒布戴拿模都係4分。E組4隊都有爭出線機會。
