熱刺球迷，曾經視干地為救世主，但經過周四凌晨歐聯16強次回合後，佢哋喺主場唔單止狂噓干地，仲大唱前領隊普捷天奴嘅歌仔，支持佢重返執教。
熱刺未能收復首回合失地，今仗主場同AC米蘭打和0比0，兩回合總計輸0比1。由於熱刺於英超及本土盃賽都已無爭標機會，今次歐聯出局，亦即代表佢哋將再次四大皆空。
縱使有豪華鋒線，連今仗在內，熱刺已連續3場交白卷，面對A米嚴密防線，只有2次中目標機會；阿根廷中堅基斯甸羅美路77分鐘粗野犯規被逐，打少個情況下，更加無力扭轉戰局。
完場一刻，托定咸熱刺球場瀰漫噓聲，更有球迷唱關於普捷天奴嘅歌仔，支持呢位前領隊回巢。事實上，自2019年普捷天奴帶隊於4強勇挫阿積士後，熱刺未贏過歐聯淘汰賽。
「我好難責怪球員唔努力，其實熱刺有好大進步，上季我哋連歐協聯分組賽都出唔到線⋯⋯」干地呢番賽後言論，對熱刺球迷嚟講無疑係火上加油，但佢哋唔駛勞氣，干地都未必有心留隊。
AC米蘭沉寂已久，相隔11年，終於再入歐聯8強，大批球迷賽後湧上街頭慶祝。事實上，A米無論上季勇奪聯賽冠軍定今次出線，成功關鍵在於一條穩健防線，而背後打造呢條蔗渣價錢燒鵝味道嘅男人，就係佢：一代忠臣名將馬甸尼。
2018年，馬甸尼出任A米體育戰略與發展總監，2019年晉升為技術總監，佢一手為球會引進左翼衛迪奧費南迪斯、中堅杜姆利、門將邁治蘭，前線嘅基奧特同拉菲爾里奧，亦係由馬甸尼引薦。
舊年A米成為意甲冠軍後，馬甸尼亦喺環球足球頒獎典禮上，被評為年度最佳體育總監。如今A米再闖歐聯8強、甚至有條件更進一步，總監馬甸尼絕對係一大功臣。
