57分鐘，差些少至夠一個鐘，睇場戲都未得，但已足夠艾寧夏蘭特入5球！周三凌晨歐聯16強次回合，曼城主場7:0大勝RB萊比錫，兩回合計贏8:1晉級。
首回合和1:1，雖然一般相信，返到主場都係曼城佔優，但勢估唔到會出現一場世紀大屠殺，慘案由22分鐘，艾寧夏蘭特射入12碼展開。挪威殺神上場英超雖然射入12碼，但亦錯失唔少機會，受到唔少批評，今仗報仇咁報，24、45、53、57分鐘再入波，直至63分鐘被調離場。
殺神全場8次射門，全部中目標，當中有5個入波，sofascore畀夏蘭特10分滿分。加埋根度簡及奇雲迪布尼建功，曼城凈勝7球，追平歐聯16強單場最大比分成績，夏蘭特個人亦創造一大串紀錄，當中包括：
1，超越麥巴比，成為最年輕嘅歐聯30球先生（22歲236日）；
2，25場歐聯射入30球，成為最快達成歐聯30球球員；
3，個人前8場歐聯淘汰賽入11球，歷史第一人；
4，今季各項賽事入39球，創造曼城隊史單賽季入球紀錄，前紀錄保持者係湯米莊遜（1928-1929年球季38球）。
夏蘭特亦係歐聯史上，第3位單場入5球球員，同球王美斯及巴西前鋒雷斯阿祖安奴睇齊。美斯2012年3月歐聯16強次回合對利華古遜，射入5球，協助巴塞隆拿大勝7比1。2014年10月歐聯分組賽，當時效力薩克達嘅雷斯阿祖安奴，對白俄羅斯球隊巴迪，射入5球，該仗薩克達亦贏7比0。
入5球滿足未？對夏蘭特嚟講，其實仲未夠，佢賽後表示，好想嚟個打孖帽子戲法，咁至夠過癮。領隊哥迪奧拿就話要保護殺神，再咁搞落去，好容易畀對手整傷，見好就收喇！但實情係咪唔想佢打破愛將美斯個紀錄？睇怕得哥帥自己先知喇。
