歐聯「死亡F組」果然夠晒激！今晨第4輪賽事，紐卡素作客吞多蒙特2蛋，而AC米蘭則以2比1反勝PSG，目前4隊之間只得3分差距，4隊都有機會出線！
紐卡素喺早場打頭陣，作客多蒙特。紐卡素傷兵滿營，丹般、伊沙克、積及梅菲、班尼斯、博文等主力全部傷晒，連埋停賽嘅東拿利，紐卡素兵源嚴重不足，今場得13個外場球員候命，後備只擺得8個，當中包括兩名門將及數位青年軍。
26分鐘，多蒙特快攻，沙比薩傳交門前，富卻古撞入，半場領先1:0。下半場，紐卡素仲係冇乜起色，79分鐘，白蘭特建功，為多蒙特鎖定2:0勝局。多仔贏波後積7分，紐卡素連輸2場後，4戰4分跌落榜尾，下輪作客PSG，輸波就肯定提前出局。
最大鑊係紐卡素中鋒哥林威爾遜，喺半場期間因傷被換走，領隊賀維話佢大腿筋有問題，暫時未知佢抖幾耐。紐卡素傷兵名單再添一人，而嚟緊周末，佢哋嘅英超對手係般尼茅夫。
至於尾場AC米蘭對PSG就激得多，A米憑基奧特創造兩個入波，以2比1反勝對手，唔單止打開勝利之門，仲一嘢跳上第3，力保出線希望。
PSG門將當拿隆馬，轉會後首度倒戈A米，被主場球迷瘋狂開汽水、撒印有佢嘜頭嘅錢，火藥味十足。上半場9分鐘，PSG中堅史堅尼亞先開紀錄，3分鐘後，A米反擊，基奧特射門被撲出，里奧倒掛抽入扳平。
下半場戰至50分鐘，又係基奧特，呢位法國老將接應菲奧靴蘭迪斯傳中，一錘定音，助A米反超前2比1，並以37歲零38日，成為A米史上第2大年紀喺歐聯入波嘅球員，僅次於恩沙基。完場前李剛仁射門中柱，注定PSG全失3分。
呢場波場外一樣咁激，雙方大約100名球迷，喺賽前及賽後均發生打鬥，比賽前一晚，更有PSG球迷被刺傷腿部，歐洲足協即將介入調查，兩間球會隨時有手尾跟。
目前4軍形勢，多蒙特7分、PSG 6分、A米 5分、紐卡素4分，下輪A米主場對多蒙特，紐卡素主場對PSG。
