【歐聯】死亡F組亂戰 多蒙特率先出生天;紐卡素被PSG爭議性逼和 賀維嬲爆:有啲嘢唔講得!

死亡F組,多蒙特出線,3雄要鬥到最後一輪!今晨歐聯分組賽,紐卡素作客被巴黎聖日耳門逼和1:1,由3分變1分,出線告急;另邊廂多蒙特以3:1擊敗AC米蘭,率先逃出死亡之組。

分組賽已踢畢5輪,多蒙特10分、PSG 7分、紐卡素與AC米蘭同得5分,多蒙特已肯定出線,餘下一席由3雄爭奪。最後一輪喺12月14日舉行,多蒙特主場對PSG,紐卡素主場對A米,紐卡素同A米形勢被動,除咗要自己贏波,仲要寄望多蒙特令PSG失分。

事實上,尋晚傷兵滿營嘅紐卡素,踢落係同PSG有得鍊,幾吓突襲都有威脅,去到23分鐘,伊沙克近射破門,先開紀錄。PSG空群出擊,不過以門神樸比為首嘅防線超硬淨,一路頂住強攻。

以為紐卡素可以守到尾,可惜臨天光失波,戰至補時7分鐘,利華文圖喺禁區內犯手球,經VAR審視後球證判12碼,PSG由隊長麥巴比操刀扳平,雙方各得1分。

紐卡素領隊艾迪賀維,賽後怒氣沖天,聲稱有啲嘢唔講得:「我哋喺最後關頭失分,我唔認為判決係正確8嘅。其實成個波有幾快,大家都知道啦,先打中心口,然後先彈向下臂……我唔作總結喇,我心入面諗咩,我唔講得出嚟,因為會有麻煩!」

另一戰,上屆4強份子AC米蘭,今季無論聯賽定歐聯,表現都跌Watt,今場佢哋主場對多蒙特,開賽6分鐘,A米獲得12碼,可惜基奧特宴客,錯過先開紀錄嘅機會。

4分鐘後,你唔入就我入,A米卡拿比亞禁區內天條,多蒙特馬高列奧斯主射12碼破網。A米換邊前由卓禾斯窄角度扳平,但下半場防線又出事,被多蒙特基天斯、艾迪耶美射破大門,最終輸1:3。