兩個爭議手球判決，令巴塞隆拿作客0:1不敵國際米蘭，賽後會方向歐洲足協提出上訴，但可能仍無法改變、連續兩屆歐聯分組賽出局嘅命運。
國米整體上略為捱打，唯一入球來自45分鐘，中場查漢奴古一個遠射。巴塞雖然作客，但反客為主，控球率高達68%，但戰術略嫌單調，全場50次傳中入禁區，仍未能造成入球。
其實有入過波，但被判詐胡。66分鐘，奧士文尼迪比利傳中，國米門將奧拿拿出迎拍波，身後安素法迪閃避不及，非蓄意但手部有觸球，因此之後柏迪雖然門前執死雞，仍被判詐胡。
到90分鐘，一個相近情況，巴塞未有得到12碼。巴塞右路傳入禁區，杜費斯頭槌解圍後，雖然非蓄意，但右手明顯有觸球，但之後經VAR判決，冇畀12碼。過程中球證只同VAR球證通話幾句，甚至冇睇片再作判決。
主席拉波塔同意下，巴塞法律部門巳向歐洲足協提出申訴，並要求今場VAR球證費博克，未來唔可以執法巴塞賽事。更有球評人認為，今場係自VAR誕生後，歐聯出現最大嘅誤判。
巴塞谷到爆都好正常，目前C組拜仁3戰9分帶頭，國米6分，巴塞3分，柏辛域陀利亞0分。下輪如果巴塞主場負國米，拜仁同柏辛域陀利亞打和，巴塞就會提早出局。
另一西班牙球隊馬德里體育會，作客亦以0:2不敵比利時布魯日。布魯日真正超級黑馬，B組3戰3勝9分領放，馬體會、利華古遜、波圖同得3分，仲有排爭。
熱刺作客法蘭克福，孫興民、哈利卡尼曾錯失機會，0:0打和。D組形勢緊湊，士砵亭6分，熱刺、法蘭克福4分，馬賽3分。
