【歐聯】最搶鏡係佢!巴塞戲劇性 3:2反勝PSG;沙維兩次神調動 1分鐘見效!

沙維盡顯級數!歐聯8強首回合豪門大戰,巴塞隆拿作客以3:2擊敗巴黎聖日耳門,次回合回師魯營,晉級樂觀。呢場波精彩到爆,雙巴互有領先,當中最搶鏡嘅唔係麥巴比或者羅拔佬,而係巴塞教練沙維!

自從沙維宣佈季尾離隊,巴塞班球員即刻生性咗好多,喺西甲已追至位列次席,喺歐聯亦頻頻有精彩演出。今場巴塞以利雲度夫斯基踢正箭頭,兩翼夏芬拿、耶馬;PSG則有麥巴比、阿辛斯奧拍倒戈嘅奧斯文丹比利,單睇兩軍星級鋒線,已預期今場會係入球騷。

作客嘅巴塞上半場大踢突擊戰術,37分鐘,耶馬右路傳中,PSG門神當拿隆馬撲橫,夏芬拿把握機會建功,半場巴塞領先1:0。

換邊後PSG發威,喺3分鐘連入兩球!倒戈嘅丹比利窄位先轟入,之後經過一輪美妙組織,由域真亞完成任務,PSG反超前2:1。落後下,沙維嚟個神調動,復出嘅柏迪61分鐘入場,唔夠1分鐘,就交出精彩長傳,夏芬拿第一時間抽射,扳平2:2。76分鐘,沙維換入中堅基斯甸臣,1分鐘後,呢位丹麥中堅接應角球頂入,巴塞首回合戲劇性贏3:2。

沙維下半場兩次神調動,入替球員都喺落場一分鐘內,分別送出助攻及入波,成為巴塞反勝嘅關鍵,各地傳媒均大讚沙維有料到,而今場亦係巴塞近5年來,首場歐聯8強勝仗。

賽後沙維將功勞盡歸球員:「球員發揮好好,令我哋攻守都好有水準,我哋擊敗咗世界最佳球隊,呢場梗係偉大勝利啦!我哋任務完成咗一半,次回合繼續努力!」

至於歐聯改制後,今次係PSG第5次喺淘汰賽主場先輸波,之前4次,佢哋都喺次回合輸多次出局。王牌麥巴比全場射門3次、0中框,PSG主帥安歷基相當失望:「今場波好遺憾,我哋創造咗唔少機會……但我相信班球員士氣猶在,次回合會盡力嘗試喺魯營贏波。」

同晚另一場8強賽事,馬德里體育會對多蒙特。馬體會憑迪保羅、連奴各建一功領先2:0,多蒙特喺比賽末段由阿拿追回一球,最終馬體會以2:1先拔頭籌。