歐聯周四凌晨F組賽事，皇家馬德里主場2:1挫薩克達，衛冕冠軍3戰全勝領放。更大意義係安察洛堤又到達執教生涯另一里程碑，佢已追平費格遜紀錄，成為歐聯贏波次數最多領隊之一。
連埋今仗，安察洛堤領軍出戰歐聯，累積102場勝仗。佢同時亦係史上奪冠次數最多領隊，共4次，包括2次AC米蘭、2次皇馬，比費格遜多2次，可以講係歐聯史上最佳主帥。
數贏波次數，肥安、老費之後，輪到光頭佬，哥迪奧拿累積96場勝仗，之後係雲格（86場）同摩連奴（81場）。
皇馬由一對巴西前鋒洛迪高高斯、雲利斯奧斯祖尼亞入波，表面上係小勝，其實徹底一面倒，全場共有36次攻門，係近6季歐聯單場攻門次數最多紀錄。
F組皇馬9分帶頭，同組對手弱，好難唔首名出線，薩克達4分排第2，RB萊比錫3分，些路迪1分。
肥安1995年由意乙里賈納展開執教生涯，之後教過帕爾馬、祖雲達斯、AC米蘭、車路士、聖日耳門、皇家馬德里、拜仁慕尼黑、拿玻里、愛華頓，到上季回歸皇馬。
27年主帥生涯，贏勻五大聯賽冠軍，連歐聯在內，大大小小盃賽冠軍共17個。63歲，魅力加功力，仲有好多錦標等緊肥安去攞。
