如果你係紅魔躉，可能會好掛住迪基亞。曼聯周四凌晨歐聯分組賽A組首仗，作客3:4負拜仁慕尼黑，龍門奧拿拿又孭鑊，佢賽後認錯，為今仗輸波負責。
連今仗在內，開季6場輸4場，坦哈格同佢班子弟兵，創出自1986/87球季以來、近37年最差開局；3連敗兼場場失3球或以上，亦係自1976年首次出現，曼聯無疑陷入危機之中。
其實紅魔開局表現唔算太曳，幾乎先開紀錄，但28分鐘卻先失守，辛尼同卡尼打one-two後起腳，冇角度冇力度，不過奧拿拿落地慢兼甩手，曼聯就係咁先失一球；4分鐘後，穆斯亞拿殺入禁區回傳，由基拿比建功，拜仁領先曼聯2:0。
曼聯在下半場反攻，49分鐘，海倫射入加盟後首個入球，追近至1:2。53分鐘，艾歷臣犯下天條被罰12碼，卡尼主射得手，再度拉開領先兩球優勢。
88分鐘，卡斯美路追成2:3，諗住掀起高潮，但拜仁又一次立即回敬，湯馬士梅拿射中柱，泰爾執雞射成4:2。曼聯於補時5分鐘，再由卡斯美路接應般奴費蘭迪斯罰球頂入，最終以3:4不敵拜仁。
奧拿拿成為輸波罪人，呢位喀麥隆門將非常自責：「我哋初段踢得好好，但失第一球後陷入混亂狀態，我要為此負上全責。」作為坦哈格子弟兵，奧拿拿加盟曼聯初期被捧上天，但季初所見，奧拿拿用波的確叻過迪基亞好多，但撲救水準實在好一般，令原本已欠穩嘅防線更牙煙，失波數字狂飈。
另一英超球隊阿仙奴，相隔6年再戰歐聯，踢出暢快淋酣嘅大勝，喺B組主場4:0大勝燕豪芬。前鋒三叉㦸薩卡、托沙、加比爾捷西斯上半場各入一球，今場MVP奧迪加特喺下半場埋齋。
