周四凌晨歐聯第4輪，曼聯葬送領先兩球大好優勢，末段連失兩球，最終作客3:4不敵哥本哈根。今次領隊坦哈格有個好好嘅藉口，指拉舒福特被逐係錯判。
依家曼聯贏一場波真係好艱難，剛周末尾段入波先至險勝富咸，以為會有番啲起色，點知又輸多場，小組跌到包尾，出線形勢相當不利。
責任永遠唔喺自己身上嘅坦哈格，賽後將輸波責任推畀球證：「首先，我哋直到紅牌出現前，都係踢得非常好，嗰張紅牌改變咗一切。之後就變成一場唔同嘅比賽……」
「況且，我哋失咗兩個唔應該成立嘅入波，實在令人失望。福仔紅牌係一個嚴苛嘅判決，而換邊後對手兩個入波唔應該成立，第一球係越位，而第二球，你可以做啲咩？唔單止今晚，我哋處於一個經常不利曼聯判決嘅賽季。」
其實曼聯初段係威係勢，開賽3分鐘，麥湯助攻，海倫近門撞入。28分鐘，曼聯快攻，海倫執雞射成2:0，以為可以輕鬆贏番場，點知42分鐘，出現改變戰局一幕！
當時拉舒福特攔截哥本哈根嘅基斯甸臣，踩中對方，VAR介入並判罰紅牌，令曼聯以10人應戰。3分鐘後，哥本哈根就追番一球。踢到上半場補時9分鐘，麥佳亞手球，迪奧高干卡維斯射入12碼，曼聯領先優勢蕩然無存，半場2:2。
換邊後，69分鐘，輪到麥佳亞博到對手犯規，VAR判今場第二個12碼，般奴射入，曼聯再度領先。不過曼聯始終係踢少個，先喺83分鐘被利亞遠柱撞入追平，4分鐘後，曼聯守將未能解圍，17歲嘅朗尼巴達積把握機會射入，哥本哈根反勝4:3。
同組賽事，拜仁慕尼黑主場憑卡尼梅開二度，以2:1險勝加拉塔沙雷。拜仁4戰全勝12分率先晉級，另外3隊非常接近，曼聯只得3分包尾，哥本哈根、加拉塔沙雷都有4分。
