娜娜又派膠，加拉塔沙雷球迷變晒Happy伯！周三凌晨歐聯A組，曼聯主場兩度領先之下，因為門將奧拿拿嚴重犯錯，令紅魔打少一個，最終以2:3反輸畀加拉塔沙雷，歐聯兩戰全敗排榜尾。
曼聯喺聯賽以0:1輸畀水晶宮，攻力極曳，嚟到歐聯決意以進攻足球翻身，正選中場用般奴費蘭迪斯、曼治、卡斯美路，拉舒福特、美治比支援海倫強攻。加拉塔沙雷今夏大肆擴軍，有莫路伊卡迪、韋費特沙夏撐場。
曼聯今場波好主動，17分鐘，卡斯美路長傳，拉舒福特右路狂推，再妙傳畀海倫頂入，不過僅開心咗6分鐘，加拉塔沙雷就由韋費特沙夏表演，力壓達洛治禁區內抽入，半場1:1。
換邊後戰至59分鐘，海倫一cup一射超靚波，盡顯功架，只可惜越位在先，不過呢位丹麥神鋒堅有料，67分鐘，海倫狂放再下一城，曼聯再領先2:1。但紅魔防線唔生性，4分鐘後又被艾度哥路建功扳平2:2。
今場勝負關鍵出現喺76分鐘，奧拿拿又用波，但直接傳咗畀加拉塔沙雷新兵梅頓斯，卡斯米路隨即喺禁區內將對手踢跌，輸12碼兼拎第2張黃牌被逐，好彩伊卡迪操刀12碼射斜，但過到初一過唔到十五，加拉塔沙雷一次反擊，曼聯中場個個掛住睇波空晒，伊卡迪一聲唔該搞掂，3:2射死紅魔。
奧拿拿兩場歐聯都派膠狂失7球，連累曼聯歷來首次喺歐聯分組賽開局兩連敗，喺A組包艇。同晚拜仁慕尼黑以2:1反勝哥本哈根，兩戰全勝高踞榜首，而加拉塔沙雷有4分，哥本哈根1分。
坦哈格賽後受訪稱：「我哋係控制晒大局，跟住就自己犯錯，鑄成敗局。我哋某啲位置要防守得好啲，依家我哋所犯嘅錯，係冇可能出現喺呢啲水平嘅大賽……我會同奧拿拿傾傾，我會支持佢，因為佢係一位出色嘅門將。」
對曼聯同坦克嚟講，今仗唯一可取嘅係前鋒海倫表現極佳。坦夏話：「佢嗰兩個入波真係出類拔萃，尤其係第二球，佢展現出嚟嘅力量好強，把握得好好。」
