哥迪奧拿又玩零換人，曼城周四凌晨歐聯16強首回合，未能保住作客領先優勢，畀德甲勁旅RB萊比錫迫和1:1。另邊廂國際米蘭主場藉盧卡古入波，1:0險勝波圖。
曼城賽前被全面睇好，但結果和波，令英超4支代表，首回合都未能贏波，熱刺、利物浦、車路士更加輸埋；反而意甲發威，國米、AC米蘭、拿玻里都領先，絕對有機會入晒8強。
今仗曼城唔算最強陣，奇雲迪布尼抱病避戰，由根度簡、貝拿度施華做中場正選，效率及傳送質素未算有大幅下跌；基亞利殊、馬列斯一對側擊好手，繼續保持良好狀態，令曼城上半場仍然控制戰局。
萊比錫主場看台，有幅超巨型彩布，寫住：「我們向伊斯坦布前進。」即使晉級決賽係近乎不可能任務，但仍要奮力一戰。主隊自知唔可以硬撼，全隊縮後打防守，上半場只有一次射門，控球率僅有25%。
雖然全力死守，特別成功緊盯艾寧夏蘭特，但到27分鐘，萊比錫仍因為自己出錯先失波。曼城藉呢個失誤，基亞利殊直線傳入禁區，馬列斯把握機會射成1比0。
萊比錫下半場爭取主動，撲前壓迫曼城，發揮迪姆華拿快攻特長，攞番唔少入波機會，而曼城形勢轉為被動，門前險象橫生，但領隊哥迪奥拿始終不動如山，未有一次換人調動，祖利安艾華利斯、菲爾科頓等可以改變戰局嘅球員，全場坐後備席，真正耐人尋味。歐聯賽事上次有球隊全場唔換人，係2018年嘅曼聯。
萊比錫努力有回報，克羅地亞中堅加華度爾藉世界盃成名，本已得到唔少大球會垂青，身價漲至7000萬歐元，佢除咗成功箝制艾寧夏蘭特，70分鐘更發揮強勁彈跳力，頭槌為萊比錫追和1比1，3月15號作客再揪過。
另邊廂，國米主場能先勝一仗，其實都有啲運仔，畀波圖攻到暈，門將奧拿拿幾次神救保不失，到78分鐘更藉對手被逐，以眾凌寡，86分鐘由後備中鋒盧卡古射成1比0完場。
