【歐聯】數據話你知 皇馬唔係比寧咸一人球隊;替身入波作客贏萊比錫 入8強穩陣

歐聯16強首回合周三凌晨展開,皇家馬德里作客RB萊比錫,喺皇牌射手、英格蘭中場祖迪比寧咸缺陣下,由替佢做正選嘅巴謙戴亞斯於48分鐘奠勝,首回合小勝1:0,再次證明皇馬並非一人球隊。

今季各項賽事為皇馬貢獻20球、8次助攻嘅比寧咸,係球隊進攻皇牌,今仗佢因膝傷缺陣,令外界擔心皇馬攻力大減。結果,皇馬全場真係只有3次中目標射門,遠低於對手萊比錫9次。

好彩皇馬門將盧連有出色表現,將萊比錫9次中目標射門全部救出。今仗頂替比寧咸正選上陣嘅巴謙戴亞斯亦交到功課,48分鐘喺禁區右邊施射得手,助皇馬小勝1:0。

連今仗在內,比寧咸今季各項賽事5次缺陣,但皇馬呢5場都贏波,所以唔可以話係比寧咸一人球隊。

冇比寧咸,仲有巴謙戴亞斯同盧連,但今場贏波功臣,首選必然係門將盧連,皇馬教練安察洛堤大讚:「今仗係一場艱難嘅比賽,上下半場初段都陷於苦戰,好在盧連表現出色,我認為呢場係佢職業生涯表現最好一仗。」

衞冕冠軍曼城就舒服得多,作客哥本哈根控制戰局,輕鬆贏3:1。入球球員有奇雲迪布尼、貝拿度施華及科頓。今晚有另外兩場16強首回合賽事,巴黎聖日耳門主場對皇家蘇斯達、拉素主場對拜仁慕尼黑。

曼城氣勢勁爆。