計唔到燒咗幾多錢嘅班底，終於打番場好波，車路士於歐聯16強次回合，主場2:0勇挫多蒙特，兩回合計反超2:1，晉級歐聯8強。
今次係車路士隊史上，第5次喺歐聯淘汰賽成功收復首回合落後劣勢晉級，追平巴塞、皇馬，成為歐聯翻盤王。
車路士終獲2連勝，慢慢走出谷底，目前最理想嘅陣式同及可用球員，答案已經好明顯。領隊樸達難得有救命稻草，斷估唔會再試新陣咁傻仔，只要跟條靚路走，就算學唔到杜曹前季咁叻捧冠軍，至少可以保平安。
上場英超1:0險勝列斯聯，樸達用番三中堅陣式，效果相當唔錯。今場兩大長老堤亞高施華、艾斯派古達仍然養傷，新兵巴迪亞斯尼又冇列入歐聯註冊名單，所以用古古列拿、高列巴尼、韋斯利科芬拿扼守防線，原本令人擔心，但最後佢哋稱職有餘，古古列拿更打出翻身戰，獲官方選為今場最佳球員。
夏維斯雖然長期冇波入，但冇代替品，繼續做正中鋒，配合祖奧菲歷斯及史達寧；最有卡士係中場線嘅安素費南迪斯、高華錫，左右翼衛列斯占士、芝維爾。
多蒙特弗爆，2023年10戰全勝，首回合先勝1:0，作客史丹福橋亦未有刻意死守，雖然只有施巴斯坦賀拿單箭頭，祖迪比寧咸、馬高列奧斯後上都有威脅。
車路士上半場形勢佔優，製造多個危險機會，如果唔係夏維斯冇運，先射中柱，之後轟入世界波又因史達寧越位而食詐胡，早已先開紀錄。
去到43分鐘，入波終於出現，芝維爾左路傳中，史達寧第一時間左腳抽射，但落空彈中右腳，原本好衰相，但佢及時調整，跟步上前用假動作呃過對手後衞，近門勁射破網，車路士半場領先1:0。
下半場僅4分鐘，車路士藉對手禁區犯手球獲得12碼，夏維斯主射中柱，但得到重射機會，呢位德國國腳再射龍門左路，今次死角入網。多蒙特上仗藉艾迪耶美千里狂奔，先勝1:0，呢位德國小將今仗因傷缺陣，其他球員亦太被動，下半場咁早失多球，令信心更低落，面對車路士中後場踢出水準，反攻欠缺致命威脅，最終輸0:2出局。
同晩另一仗，賓菲加主場大勝布魯日5:1，兩回合狂數7:1，連續兩屆晉級8強，創下球會紀錄。
