【歐聯】拜仁兩勝阿仙奴5:1 佢都有士哥!湯馬士梅拿:今時唔同往日喇……

歐聯8強首回合殺到埋身,今晚就有兩場超級大戰!英超爭標雙雄曼城同阿仙奴分途出擊,曼城就會作客鬥皇馬,阿仙奴就火併宿敵拜仁慕尼黑。

以往阿仙奴對拜仁,畀人嘅感覺好似冇得打咁,因為兩軍近3次喺歐聯嘅對賽,拜仁都係大勝阿仙奴5:1!當然,計番已經足足係8年前,即2016年嘅事喇。

2015年,當時嘅拜仁如日中天,佢哋喺分組賽同阿仙奴同組,結果拜仁大勝5:1,湯馬士梅拿梅開二度;當屆拜仁最終殺到入4強,而阿仙奴就喺16強被巴塞淘汰,而呢次亦成為阿仙奴惡夢嘅開始。

2016/17歐聯,拜仁同阿仙奴喺16強又碰頭,首回合拜仁贏5:1,梅拿入一球,次回合拜仁再贏5:1,梅拿就冇上陣,專心抖抖。兩回合計狂輸2:10,成為阿仙奴嘅慘痛回憶。

再計遠啲,由2013年計起,湯馬士梅拿曾經喺歐聯7次對阿仙奴,就射入咗5球,名副其實係爆廠高手。呢位已經34歲嘅老將,早前續約至2025年夏天,係拜仁不可多得嘅超級忠臣。

喺上場聯賽,拜仁反輸畀海登咸2:3,成為球會史上嘅奇恥大辱,偏偏呢場波正正係梅拿第700次為拜仁披甲嘅里程碑。700次,亦係拜仁球會史上第二多披甲嘅球員,距離上世紀6、70年代傳奇門將美亞(Sepp Maier、下圖中),只差9場,梅拿要超越前輩指日可待。

愛之深、責之切,今季拜仁面臨四大皆空,梅拿喺日前受訪,希望隊友及球迷接受現實、再努力出發:「好明顯,我哋已經唔係最輝煌時期嘅拜仁慕尼黑,但我哋有嘅係鬥志,忘記呢場敗仗(2:3不敵海登咸),提起精神,面對阿仙奴嘅新挑戰!」