【歐聯】悲情萊斯 出場2分鐘即失波;皇馬2:0挫多蒙特 卻奧斯創歷史:全靠心理質素

萊斯難逃悲情結局。周日凌晨歐聯決賽,萊斯下半場後備入替,2分鐘後多蒙特即失波,結果以0:2不敵皇家馬德里。近11年皇馬6次封王、歷史性第15次奪冠;主帥安察洛堤6入決賽5度封王,卻奧斯、拿祖、摩迪、卡華查6奪歐聯冠軍,同樣無人能及。

皇馬季初有多名主力重傷,正宗9號中鋒亦只係得借將荷西路,原本今季預計係一個過渡性球季,等待麥巴比加盟,但估唔到最終成為歐聯、西甲、西盃3料冠軍,冇錯,呢隊就係皇馬。

34歲嘅卻奧斯,斬獲皇馬生涯第22個冠軍,另外為德國國家隊贏得1次世界盃,月中展開嘅歐國盃,將會係佢足球生涯最後一項賽事。卻奧斯賽後話:「用冠軍告別,當然完美!但老實講我哋今日表現唔算好,上半場唔輸有運……不過,皇馬喺決賽係唔會輸波,強大心理好重要,我哋可以喺劣勢下贏波,呢點亦係皇馬比其他球會更優勝嘅地方。」

多蒙特今仗表現相當好,無奈對手係皇馬。蜜蜂兵團上半場點數贏晒,防守緊密,令皇馬欠缺有威脅埋門外,直線快攻更多番撕破對手防線,出現多次幾乎致命嘅攻門。艾迪耶美、沙比薩先後有單刀埋門機會,但都未能把握,中鋒富克洛更曾射中柱,多蒙特上半場未能開紀錄,實在非常不值。

皇馬逃過大難,下半場谷前搶截,攞番唔少攻勢,雙方互有攻守。多蒙特72分鐘換入萊斯,企圖加強攻勢,但2分鐘後即告失守。

皇馬右後衛卡華查,下半場頻頻助攻,非常搶眼,74分鐘接應卻奧斯開出嘅角球頂入,為球隊先開紀錄。多蒙特大好形勢下先失守,當堂散晒,83分鐘,後場交波又被比寧咸截到,後者交雲尼斯奧斯射成2:0。富克洛86分鐘入波食詐糊,注定多蒙特再次敗走溫布萊球場。

萊斯、曉姆斯最後一次為多蒙特上陣,原本想彌補11年前遺憾,可惜仍然冇辦法避過悲情結局。