新一季歐聯分組賽殺到埋身，尋晚UEFA就進行抽籤儀式，大家最期待嘅死亡之組，係拜仁、巴塞同國米，巴塞前鋒羅拔利雲度夫斯基啱啱轉會就要倒戈，而佢昔日喺德甲嘅對手夏蘭特，嚟緊都要為曼城出戰，倒戈多蒙特，夠晒話題性。
A組利物浦都算抽到好籤，同組得阿積士、拿玻里同格流，晉級冇咩難度。B組出線席位應不離波圖、馬體會、利華；C組就激咯，巴塞、拜仁連續兩屆被編埋同一組，巴塞上屆主客都輸3球，19/20就仲大鑊，2:8慘遭血洗一幕，唔少球迷依然歷歷在目，加埋國米擾亂大局、羅拔佬倒戈，呢組都幾多嘢睇。
D組歐霸盟主法蘭克福、英超熱刺、葡超士砵亭同法甲馬賽實力相距不大，預計有一番惡鬥；E組車仔、AC米蘭、薩爾斯堡打餐飽，F組皇馬就爽咯，呢支衛冕冠軍同組對手只係RB萊比錫、薩克達同些路迪，條籤都算幾靚。
G組曼城就冇咁好彩喇，同組對手有歐霸之王西維爾、德甲多蒙特同丹麥嘅哥本哈根，夏蘭特一轉會就要倒戈。H組亦有睇頭，祖雲達斯同巴黎聖日耳門嘅對決，將會成為呢組嘅焦點。
歐聯分組賽形勢：
A組：阿積士、利物浦、拿玻里、格拉斯哥流浪
B組：波圖、馬德里體育會、利華古遜、布魯日
C組：拜仁慕尼黑、巴塞隆拿、國際米蘭、柏辛域陀利亞
D組：法蘭克福、熱刺、士砵亭、馬賽
E組：AC米蘭、車路士、薩爾斯堡、薩格勒布戴拿模
F組：皇家馬德里、RB萊比錫、薩克達、些路迪
G組：曼城、西維爾、多蒙特、哥本哈根
H組：巴黎聖日耳門、祖雲達斯、賓菲加、海法馬卡比
