大癲！又係比寧咸！周三凌晨歐聯C組，皇家馬德里作客以3:2反勝拿玻里，比寧咸一傳一射，再加上華維迪超級世界波，帶領皇馬喺小組2戰全勝排榜首。
皇馬今仗有主帥安察洛堤倒戈，正選出盡黃金中場線，包括有比寧咸、卻奧斯同費達歷高華維迪，前面依然係巴西孖寶雲尼素斯同洛迪高。至於拿玻里有基華拉斯基利亞，同埋近期同球會鬧出不愉快事件嘅奧斯文。
上半場19分鐘，拿玻里角球攻勢，皇馬未能解圍，奧斯迪加力壓守將頂入、領先1:0。僅7分鐘後，比寧咸截到個波後推進，再交畀雲尼素斯窄角度抽入，扳平1:1。34分鐘，英格蘭巨星比寧咸喺中場起動，單騎直闖拿玻里禁區，扣過敵將後射成2:1，皇馬反先2:1完半場。
拿玻里貴為意甲冠軍，堅有戰力，下半場54分鐘博到12碼，伊連斯基操刀搞掂，再次追和2:2。不過皇馬始終有歐聯之神保佑，78分鐘，費達歷高華維迪炮彈式遠射，中楣後再反彈省中拿玻里門將阿歷斯美列特彈入，最終皇馬贏3:2。
20歲嘅比寧咸，今季加盟皇馬後交出超恐怖表現，9場比賽有8個入波、3次助攻，仲癲到6場當選「最佳球員」，加上佢身穿5號球衣，令唔少球迷諗番起當年嘅施丹。
皇馬教練安察洛堤賽後話：「比寧咸真係好勁，佢最令我覺得不可思議嘅地方，係佢只得20歲，但成熟到好似一個30歲嘅球員咁，一個咁年輕嘅球員，竟然有咁高質素，實在係好罕見！」
