歐聯最大台化、恩怨情仇史詩式劇情，一次過喺曼聯對哥本哈根呢場波度發生！曼聯憑主角勵志哥麥佳亞一錘定音，加上奧拿拿勇救12碼，呢對歡喜冤家聯手，助曼聯打開本屆分組賽勝利之門，一攬泯恩仇！
曼聯喺分組賽兩戰輸晒，今場可以話係背水一戰唔衰得，般奴、麥湯文尼、安拉拔孭起中場線，前面拉舒福特、安東尼支援中鋒海倫。提到海倫，佢喺哥本哈根出身，今場生死戰唔單止倒戈，佢仲有對孖生細佬依家踢緊哥本哈根，當中奧斯卡海倫今仗都有落場，生死戰倒戈鬥細佬，夠晒大台Feel。
不過海倫今場波只係配角，曼聯雖然主場出擊，但表現好一般，開賽僅6分鐘，就差啲被哥本哈根嘅迪奧高干沙維斯反擊得手，好彩中柱冇事。上半場曼聯入肉攻門唔多，中場創造力不足，換邊後，坦哈格即時換入艾歷臣，希望多啲波餵到畀海倫。
去到63分鐘，坦哈格換走安東尼，用加拿祖入替，終於喺72分鐘，男主角麥佳亞挺身而出，接應艾歷臣斬中頂入，領先1:0。
以為大局已定，點知完場前再起高潮，哥本哈根獲得12碼，曼聯名將軒歷拿臣之子佐敦拿臣主射，不過原來佢係嚟報恩，拿臣一射被奧拿拿救出，膠龍同樣大翻身，男主角麥佳亞亦不計前嫌，開心祝賀奧拿拿，二人真正連線，令曼聯保住出線希望。
麥佳亞由籮底橙變英雄男主角，夠晒奇情勵志，賽後佢亦不忘提吓歡喜冤家兼好拍檔：「我哋表現唔完美，好彩仍取得重要勝仗，我哋需要把握得更好！好彩呢條友仔（奧拿拿）挺身而出（救12碼），呢個係好重要嘅撲救。」
對於曼迷狂嗌自己個名，呢位過去兩年被球迷奚落嘲笑嘅英格蘭中堅，顯得份外感觸：「我冇諗太多，我只係自豪，為自己過去呢6至12個月所做嘅感到高興。我終於等到正選機會，我想幫曼聯打番起、去番屬於佢嘅位置。」
另一面唱雙簧嘅，係男二奧拿拿，佢冇邀功咁大讚曾經畀佢喪鬧嘅麥佳亞：「哈利（麥佳亞）取得重要入球，佢先係功臣，我只係做番本份啫。最重要係幫到球隊全取3分。我哋踢咗一場好艱苦嘅勝仗。」
同晚拜仁喺早場，作客以3:1擊敗加拉塔沙雷，歐聯A組目前形勢，拜仁以9分遙遙領先，加拉塔沙雷4分守次席，曼聯開齋後3戰3分排第3，哥本哈根1分包尾。
