【歐聯】多蒙特狠辣狂攻贏4:2 入4強對PSG;馬體會慘情出局 仍有5000萬歐元落袋

聖日耳門作客逆轉,淘汰巴塞夠晒激,蜜蜂軍團亦唔輸蝕!多蒙特於周三凌晨歐聯8強次回合,上下半場各入兩球,主場以4:2擊敗馬德里體育會,戲劇性以5:4殺入4強。

多蒙特首回合作客輸1:2,次回合全軍谷前狂攻,34分鐘,侯姆斯過頭波傳入禁區,白蘭特窄角度抽入,領先1:0,總比數追和2:2。

短短5分鐘後,伊恩馬森接應沙比薩傳送、妙射得手,拉開到2:0,多仔總比數反超前3:2完上半場。馬體會領隊施蒙尼下半場一口氣換入三人,實行絕地反擊,49分鐘,老將曉姆斯擺烏龍,馬體會追成1:2。64分鐘,後備安祖哥利亞射成2:2,總比數反超4:3。

以為多蒙特出局在即,但佢哋永不放棄,攻勢快夾狠,71分鐘,兩年前仲踢緊德乙嘅富克洛,頂入靚絕頭槌,多仔再領先3:2。3分鐘後,佢助攻畀沙比薩射成4:2,多蒙特總計贏5:4晉級,4月30號凌晨4強首回合,主場先對聖日耳門。

施蒙尼賽後冇怪球員,話佢哋已經搏盡,輸波都無話可說。雖然8強止步,馬體會同日依然有喜訊,因為巴塞隆拿出局,令佢哋鎖定明年改制後嘅世界冠軍球會盃參賽資格,穩袋5000萬歐元。