【歐聯】地獄黑仔王!中楣中柱破紀錄 PSG輸0:1;多蒙特11年後再入決賽 兩大老將盼童話結局

慘!慘!慘!巴黎聖日耳門周三凌晨歐聯4強次回合,主場0:1輸畀多蒙特,合計輸0:2無緣決賽。呢支法國班霸今仗4次中柱同楣,加埋首回合兩次,整個準決賽6次中楣中柱,堅係地獄黑仔王。

巴黎聖日耳門今場圍攻多蒙特,全場共有30次射門,但5次中目標攻門,都被多仔門將基哥高保化解,仲有4次射門就被門柱和門楣阻擋,注定要出局。

連同首回合兩次擊中門框,巴黎聖日耳門4強兩回合合計,共有6次被門框阻擋;總計本季歐聯,佢哋總共14次中柱及楣,打破巴塞隆拿紀錄,成為自2003至04球季有統計以來,單季歐聯中楣中柱次數最多嘅球隊,晉升史上最黑。

多蒙特領隊泰錫亦承認贏得夠運,而最開心嘅,當然係一對老臣子曉姆斯同萊斯,佢哋繼2012至13球季後,再次帶領多蒙特躋身歐聯決賽,將同拜仁或皇馬爭奪冠軍。

曉姆斯今仗一箭定江山,繼首回合後再次當選最佳球員,以35歲高齡成為晉級最大功臣;至於從未為球隊贏得重大錦標嘅萊斯,季尾將結束効力多仔多年嘅歲月,佢賽後表示今次歐聯決賽,如果好似11年前咁輸畀拜仁,最終只得亞軍的話,呢個故事就會由童話變悲劇,所以佢一定會搏埋條老命,力求寫下最完美結局。