【歐聯】國米首回合1:0贏馬體 數據啟示入硬8強?施蒙尼輸波有安慰 終於睇齊9大名帥

兩位施蒙尼對戰,結果佢贏咗!施蒙尼恩沙基帶領嘅國際米蘭,周三凌晨歐聯16強首回合,主場1:0擊敗由施蒙尼督師嘅馬德里體育會。雖然只係小勝,但數據顯示國米呢支上屆亞軍,晉級8強機會高唱入雲。

之前國米喺歐洲賽兩回合淘汰賽,有17次首回合主場以1球差距勝出,當中15次最終成功晉級,比率相當高。

上半場,國米藉主場之利佔盡上風,13分鐘,拿達路馬天尼斯抽射,疑似省中拿維摩連拿隻手,但球證未有判罰12碼。換邊後,國米依然係主動嘅一方,可惜射唔破馬體會門奧比歷十指關,直到完場前7分鐘,馬體會喺中場斷纜,令拿奧達路半單刀,雖然射門畀奧比歷救到,但阿拿奧杜域趕到,執隻靚雞做英雄。

奧地利前鋒阿拿奧杜域今場以後備身份登場,上陣後曾錯失黃金入球機會,當時攝影師影到看台上主隊球迷搖晒頭,神情失望及憤怒。好彩,國米今場最終都係由呢位34歲鋒將奠勝,敗家仔變英雄。

教練細恩喺賽後亦力撐阿拿奧杜域:「大家都為佢嘅失機感到失望,但我都踢過前鋒,相比起錯失機會,我更擔心嘅係冇機會畀我錯失,結果大家有眼見,阿拿奧杜域係我哋陣中極有價值嘅球員。」

雖然輸波,今場仍然係馬體會主帥施蒙尼嘅里程碑,第100場執教歐聯賽事,成為歷史上第10位解鎖呢項成就嘅主帥,前9位包括安察洛堤、費格遜、雲格、哥迪奧拿、摩連奴、盧西斯古、阿基里。

同日另一場16強首回合,多蒙特先開紀錄,但下半場失守,作客燕豪芬被逼和1:1。