講到國際米蘭最吸睛嘅球員，必定係風頭躉盧卡古。至於阿根廷射手拿達路馬天尼斯，亦都係球迷焦點之一。實在球隊仲有唔少好球員，雖然名氣唔響，但於今季歐聯路途上都貢獻良多，其中一個就係左翼迪馬高。
左腳仔迪馬高現年25歲，係由國際米蘭自家培育。職業生涯初期經常被外借，之前踢過阿斯科利、安玻里、帕爾馬及維羅納，亦曾短時間效力過瑞士球隊錫永。
或者成日去唔同球隊作賽，令到迪馬高適應力特別強，好快就可以融入到新體系當中。經過長時間磨練，國際米蘭於21/22年球季收回己用，正式成為球隊主力。
今季歐聯賽事當中，暫時助攻次數最多係皇馬球員雲尼素斯，共有6次。並列第2位就包括迪布尼、簡些路以及迪馬高，3位各有5次助攻。
數字能夠同幾位大名球員睇齊，可見迪馬高質素唔曳。迪馬高除咗傳中落點準之外，射罰球一樣耍家。加上佢體能十足，無論前場進攻或者後場防守都見到佢身影。又勤力又有技術，難怪深得領隊施蒙尼恩沙基重用。
4月尾曾經有報導指，英超球隊韋斯咸希望以4000萬鎊收購迪馬高。再較早時間，有傳曼城亦都派過球探到意大利，觀察迪馬高嘅表現。
若然國際米蘭今次入到歐聯決賽的話，相信迪馬高會吸引到更多人留意，甚至下季去英超搵食亦都唔奇。
