咁至係波！打番出紅軍氣勢。周三凌晨歐聯A組，利物浦主場盡出4大前鋒，狂攻格拉斯哥流浪，最終順利贏2:0。特別係阿歷山大阿諾特，除射入世界波外，連九流防守都有啲改善，總算爭氣。
利物浦之前喺英超第4輪，因為開季表現差，主場搵般尼茅夫祭旗，狂炒9:0，挽回比賽信心；但之後賽事依然遠低於應有水平，上仗3:3和白禮頓，又係被彈到體無完膚，網上更出現大量要炒高普言論。
又到打爭氣波，安撫擁躉時候，咁啱主場迎戰相對較弱嘅格流，冇理由唔求大勝，實行全攻陣，出齊4個前鋒，達雲紐尼斯、沙拿、迪亞高祖達、路爾斯戴亞斯，皆陳列陣前。
近期唔少利物浦球員受到抨擊，當中被鬧得最甘，一定係助攻一流，防守九流嘅阿歷山大阿諾特，由於格流攻勢較弱，令佢可以放心助攻，並喺開波7分鐘，用佢超級右腳，射入靚絕罰球，為利物浦先開紀錄。
紅軍上半場徹底控制戰局，製造多個攻門機會，格流全面捱打，全靠門將麥基哥作出多次撲救，先至冇再多失，亦令利物浦雖然有14次攻門，7次中目標，半場只能領先1球。
贏一粒點夠喉，下半場繼續狂攻，但依然未能把握機會，只有沙拿53分鐘射入12碼，最終贏2:0完場。雖然未能大勝，但紅軍係打出氣勢，有番高強度逼搶，最難得連阿諾防守意識都大有改善，當然，對手較弱亦係原因之一，但點都好，贏番場對信心提升一定有幫助，周日英超作客阿仙奴，又有激戰睇。
A組另一戰，拿玻里依然勇猛，作客阿積士先失1球下，但瞬即由拉斯柏度尼、迪羅倫素、施連斯基建功，上半場已反先3:1，下半場再入多3球，以6:1大勝，認真瘋狂。拿玻里3戰9分繼續排榜首，利物浦6分，阿積士3分，格流0分包尾。
