【歐聯】又派膠!兩度領先兩球 3:3和加拉 曼聯出線難度高;坦哈格:奧拿拿表現OK!

雖然領先過2:0同3:1,但曼聯周四凌晨喺歐聯A組作客加拉塔沙雷,因為門將奧拿拿犯大錯,最終被逼和3:3,5戰4分續排包尾,晉級形勢極度惡劣。

「我哋由領先到和波,我為球員嘅表現感到高興,但同時都要批評我哋嘅防守……」曼聯領隊坦哈格賽後受訪嗰陣,再有記者問佢,邊個應該負失分責任,坦哈格話:「3個失波都唔應該發生,我哋要從中學習,奧拿拿表現OK,問題唔喺個別球員身上,要負責嗰個係我。」

至於隊長般奴費蘭迪斯,就暗示球員或者領隊戰術唔夠醒:「老實講,由贏變和真係好曳!我哋要明白踢呢類大賽,一定要踢得聰明啲,要諗辦法將比賽控制得好啲!」

今仗非勝不可嘅曼聯,11分鐘已先開紀錄,般奴交予加拿祖抽射破網,呢位阿根廷球員,拎到個人第一個歐聯士哥。7分鐘後,般奴喺禁區外射個曲墜世界波,領先到2:0;加拉塔沙雷反撲,薛耶治喺29分鐘處理罰球,曼聯門將奧拿拿判斷出錯,個波彈地入網,半場曼聯領先2:1。

換邊後戰至55分鐘,麥湯文尼接應傳中射成3:1。事實上,唔計奧拿拿,曼聯今仗表現的確唔差,但領先到3:1後,坦哈格換走表現突出嘅海倫同安拉拔,令形勢開始逆轉。

62分鐘,又係罰球同薛耶治,奧拿拿將一個冇力度冇角度嘅波擋入網,追成2:3嘅加拉塔沙雷如狼似虎,71分鐘,艾度哥路入楔勁射,個波喺奧拿拿近柱位入網,3:3,完場前般奴曾射中柱,注定曼聯失分。

派膠片回帶

曼聯由贏變和,續以4分列榜尾,落後哥本哈根同加拉塔沙雷1分。曼聯最後一仗嘅對手係拜仁慕尼黑,想出線的話,曼聯除咗一定要贏,同時仲要寄望哥本哈根主場對加拉塔沙雷和波收場,任何一方勝出,就算曼聯贏拜仁都冇用,最多都係轉戰歐霸盃。

曼聯出線唯一條件:
贏拜仁+哥本哈根和波