倒戈奠勝局！歐聯第2輪，G組曼城完場前10分鐘內入兩球，主場2:1反勝多蒙特，艾寧夏蘭特以金球射爆前球會，繼續瘋狂入球之旅。
多蒙特已經精心部置，全力防守，特別係圍堵首度倒戈嘅夏蘭特，並由祖迪比寧咸喺56分鐘先開紀錄。之後曼城㩒掣，換入貝拿度施華、菲爾科頓、祖利安艾華利斯，以全強攻力反撲。
連環發炮，史東斯80分鐘遠射扳平；84分鐘祖奧簡些路長傳入禁區，夏蘭特飛身挑射，以一個超高難度靚波，射死多蒙特；雖然入金球，但夏蘭特為尊重前球會，冇激情慶祝。
夏蘭特今季經過6場英超、2場歐聯，已經射入13球；頭21場歐聯有26個士哥，歷史上首位達此成就球員。如果冇傷患影響，喺曼城源源不絕供應之下，入球機器將不斷刷新紀錄。曼城G組兩戰全勝領放，多蒙特3分，西維爾、哥本哈根同得1分。
E組，車路士主場又失分，被薩爾斯堡迫和1:1，只得1分包尾，陷入出線危機。AC米蘭主場3:1勝薩格勒布戴拿模，以4分帶頭；戴拿模3分、薩爾斯堡2分。
前白禮頓主帥樸達接替杜曹，首度督師車路士，最大變動係唔用3中堅，改踢4213陣式。雖然佔盡優勢，並由史達寧先開紀錄，但車仔入球能力始終較弱，未能拉開比數，反而被對手反擊扳平。1和1負，係車仔歷來歐聯最差開局。
祖雲達斯，亦創歐聯最差開局，主場1:2負賓菲加，頭兩場輸晒，同海法馬卡比同樣零分，H組包尾。祖記近7仗僅1勝，賽後畀主場球迷狂噓。
同組聖日耳門show time，美斯、麥巴比、尼馬一人一球，作客3:1反勝海法馬卡比，同賓菲加都有6分。
衞冕皇家馬德里繼續強勢，主場2:0挫RB萊比錫，開季8連勝，領隊安察洛堤進入歐聯100勝里程碑，僅次於費格遜102勝。F組皇馬6分領放，薩克達4分，些路迪1分，RB萊比錫0分。
