以為絕殺，點知係詐胡，激到干地食埋紅牌！熱刺主場1:1賽和士砵亭，未能提前出線，D組4隊都仲有出線機會，最後一輪嚟個大決戰！
熱刺於英超連環不敵曼聯、紐卡素，領隊干地被球迷大彈戰術保守、浪費攻力。今仗表現亦普通，畀士砵亭喺上半場先開紀錄。
經過一輪苦攻，熱剌賓坦古亞喺80分鐘頂入扳平；補時最後一個攻勢，哈利卡尼近門射入，球證已指向中圈，以為絕殺成功，但經VAR研究後，指卡尼越位在先、熱刺慘食詐胡，激到干地發癲抗議，畀球證趕出場。
D組真係好睇過戲，熱刺8分，士砵亭、法蘭克福7分，馬賽亦有6分。下周三凌晨最後一輪生死戰，熱刺作客馬賽、士砵亭主場決戰法福。
英超球隊獨欠熱刺，事關利物浦亦繼曼城、車路士後，提早打入16強。「紅軍」作客3:0贏阿積士，沙拿、達雲紐尼斯及哈維艾利洛入波。上場英超輸畀森林，利物浦被彈到體無完膚，嚟到歐聯演出總算有改善。高普賽後承認，以利物浦季初嘅困難情況，入到16強，的確可以暫時緩解一下壓力。
至於上輪已提早於A組出線嘅拿玻里，繼續狂風掃落葉，作客3:0贏格拉斯哥流浪，5戰全勝入20球只失4球，加埋意甲9勝2和，唔知個輸字點寫，弗到冇朋友。
巳晉級歐聯16強球隊
A組：拿玻里、利物浦
B組：布魯日、波圖
C組：拜仁慕尼黑、國際米蘭
E組：車路士
F組：皇家馬德里
G組：曼城、多蒙特
H組：聖日耳門、賓菲加
