【歐聯】包尾出局!曼聯主場0:1負拜仁 4分墊底;又創史上最差 坦克可以撐到幾時?

最終奇跡冇出現,仲要墊底!曼聯周三凌晨歐聯主場迎擊拜仁慕尼黑,喺非勝不可嘅情況下以0:1輸埋,紅魔喺A組包尾,連轉戰歐霸盃嘅資格都冇。

今次係曼聯歷來喺歐聯分組賽第6次分組賽出局,而包尾就係第二次,對上一次係2005/06年賽季,至於6戰得4分,更加係曼聯分組賽史上最少分數。

曼聯今屆分組賽得4分,創下最差歷史。

除咗輸波出局、唔見一大筆錢之外,兩大防守主力麥佳亞、勞基梳爾今仗同時傷出,未來兩仗要連環硬撼利物浦、阿仙奴,一個唔好彩兩場輸晒甚至大敗,領隊坦哈格會唔會攞完11月英超最佳領隊之後,成為2024年第一個落鑊嘅主帥呢?

講番今場戰況,曼聯既要贏波,同時要寄望哥本哈根對加拉塔沙雷和波,先有機會出線。曼聯正選用番喺歐聯有士哥嘅海倫掛帥,華拉尼亦自10月下旬以來,首度做番正選中堅。拜仁雖已出線,但剛喺德甲畀法蘭克福大炒,急求反彈,今仗亦強陣出擊,卡尼、辛尼同京士利高文列陣。

拜仁開賽已反客為主,戰至上半場尾段,麥佳亞因鼠蹊傷退下火線,由莊尼伊雲斯入替。換邊後,曼聯有個入球機會,但般奴費蘭迪斯無人看管下射門,卻遠離目標。70分鐘,卡尼妙傳畀入楔禁區嘅高文射入,判紅魔死刑。

同組嘅哥本哈根亦無和波,佢哋憑利亞喺58分鐘建功,主場以1:0擊退加拉塔沙雷,以8分次名出線,而加拉塔沙雷5分得第3,獲轉戰歐霸盃入場券。講開歐霸盃,今屆冇得再叫「西維爾盃」。事關西維爾喺最後一輪,作客1:2負朗斯,同曼聯一樣喺小組包尾,冇得轉戰歐霸盃。