紅軍危城告急，好在有格流，幫手省番起信心。周四凌晨歐聯A組，先有法明奴2射1傳，再嚟沙拿後備登場，6分鐘內上演帽子戲法，利物浦作客7:1大炒格拉斯哥流浪。
大屠殺後，利物浦4戰得9分，餘下兩仗只要攞多1分，就肯定出線。拿玻里主場4:2再贏阿積士，4戰全勝12分，率先晉級16強。阿積士3分排第3，墊底格流0分。
歐聯賽前，今季進攻核心路爾斯戴亞斯受傷，起碼缺席未來10場比賽，令原本已成績不濟嘅紅軍，更加雪上加霜。作客格流，用埋哈維艾利洛、法比奧卡華路打正選，先收起沙拿、祖達，周日大戰曼城前，畀機會佢哋抖一抖。
計波點止高格流一班，但利物浦防線今季真係幾恐怖，17分鐘中路被劏穿，再次喺賽事初段落後0:1。高普場邊睇到搖晒頭，好在救星好快就出現。
如果話進攻核心係路爾斯戴亞斯，咁佢就係王牌射手：法明奴！呢位巴西國腳繼續入球停不了，以一己之力解救球隊困局。24分鐘先以頭槌扳平，55分鐘再走靚位，接應祖高美斯靚傳近門掃入，助紅軍後來居上；66分鐘再靚交畀達雲紐尼斯，射成3:1。
沙拿之前表現令人失望，今仗先任後備，勝局已定下，68分鐘被派上陣，即喺75、80、81分鐘連中三元，成為歐聯史上完成時間最快嘅帽子戲法，3個入球同樣由祖達助攻！加埋哈維艾利洛最後入多球，利物浦大炒唔夠班嘅格流，總算喺周日英超大戰曼城前，打番支強心針。
法明奴季前備受質疑，話利物浦應該放佢走，然後留住文尼。呢位31歲巴西前鋒，永遠面帶笑容，EQ夠高，頂住壓力。今仗兩個入球，來自一頭一腳，令紅軍扭轉落後劣勢，非常關鍵，高分當選今仗最佳球員，實至名歸。計各項賽事，法明奴共入8球，成為目前紅軍首席射手，之前嘅批評者，全部都已收晒聲。
